Naiwawa a bala, nasukalan iti ulo ti biktima

NARVACAN, Ilocos Sur – Saan pay nga ammo ti kinasiasino ti nagpaputok iti paltog a naitiro iti maysa a baro bayat ti panagay-ayamna iti biliar idi rabii ti Disiembre 30, 2011.

Iti naladaw a report a dimmanon iti polis ditoy nga ili, natamaan iti naiwawa a bala ti ulo ni Roldan Castillo y Busante, 16, baro, bayat ti panagay-ayamna iti biliar iti ruar ti pagtaengan ni Vicente Mangaoang idi agarup 11:30 ti rabii ti Disiembre 30.

Mapapati a naglusdoy lattan ni Castillo ket intarayda iti Narvacan District Hospital sa naiyalis idi Enero 2, 2012 iti Gabriela Silang General Hospital iti Vigan City a nakasukalan ti doktor a nangiwayat iti computer tomography scan iti biktima nga adda bala iti ulona a naggapu iti di ammo ti kalibrena a paltog.

Naiyalis manen ni Castillo iti Ilocos Training and Regional Medical Center, San Fernando City, La Union para iti naing-inget a pannakatamingna.#