Naiyanud a bangkay, nabigbig

ALILEM, Ilocos Sur – Nabigbigen ti bangkay ti lalaki a nasarakan iti Amburayan River a sakup ti Sitio Palasipas, Barangay Dalawa, ditoy nga ili idi agsapa ti Hunio 29.

Nabigbig ti biktima a ni June Lagadeo y Lepiting, 23, baro, latero, ken residente iti Sitio Balbalanlang, Barangay Badeo, Kibungan, Benguet.

Nasarakan ni Isagani Legaspi, barangay police, ti bangkay bayat ti panagipakatna iti banniitna iti nasao a karayan ket inreportna daytoy iti polis a nangipatulod iti flash report kadagiti kabangibangna a police stations no adda mapukpukaw a residente iti hurisdiksionda.

Mapapati a naiyanud ti biktima idi bimmallasiw iti napegges a karayan iti lugarda idi agsapa ti Hunio 25 maigapu iti ilalabas ni Bagyo Falcon.#