Naiyanud a bangkay, nasapulan

QUIRINO, Ilocos Sur – Nabirokan dagiti polis idi Agosto 28 ti maysa a bangkay ti lalaki iti waig ti Sitio Bucnit, Namitpit ditoy nga ili a mapapati a maysa kadagiti naiyanud gapu iti flashflood ken landslide sadiay Suyoc, Mankayan, Benguet idi kangitingitan ti Bagyo Ineng.

Sangapulo ket walo dagiti naireport a biktima ti landslide ken flashflood iti nadakamat a lugar.

Agtayag ti lamolamo a bangkay a medio nagaburan iti darat iti 5’1”, kalkalaingan ti pammagina, ken agtawen iti 25-30.

Ngem saan a nabigbig dagiti agsapsapul manipud Mankayan agsipud ta agruprupsan ti bangkay.

Naipan ti bangkay iti Mankayan, Benguet para iti posible a panangbigbig dagiti kakabagianna.#