Nakaatal iti ubing, nakasuan

VIGAN CITY – Naipilaan iti kaso iti city prosecutor’s office ditoy itay lawasna ti nakaatal iti maysa nga ubing nga agbasbasa iti elementaria iti Bantay, Ilocos Sur.

Naidarum ni Angelo Rapacon, 35, naasawaan, residente iti Pantay Fatima, ditoy siudad iti rekless imprudence resulting to homicide iti city prosecutor’s office mainaig iti pannakadungparna ken ni Bonifacio Pardo, 6, Grade I pupil ti Silang Elementary School iti Bantay, Ilocos Sur.

Segun iti inbestigasion ti polis, kagapgapu ni Pardo iti eskuela ket mapapati a bimmallasiw iti kalsada a puon ti  nakadungparan kenkuana ni Rapacon a nakalugan iti Honda Wave a motorsiklo.

Natay ti ubing bayat ti pannakaagasna iti Metro Vigan Cooperative Hospital.

Naipaagas met ni Rapacon iti St. James Hospital sa simmuko iti polis.#