Nakabil a lalaki, pimmusay iti ospital

GALIMUYOD, Ilocos Sur – Pimmusay iti ospital a nakaitarayanna ti maysa a biktima iti pannakakabkabil sadiay Barangay Abaya, ditoy nga ili idi malem ti Agosto 9, 2014.

Iti belated report manipud iti police station ditoy, pimmusay ni Arnel Asena y Astrero, 39, baro, ken residente iti Barangay Tucgo, Candon, Ilocos Sur, idi Agosto 10 bayat ti pannakatamingna iti Ilocos Regional Hospital, San Fernando City, La Union

Gapu itoy, nakasuan iti homicide ti nangkabil kenkuana a ni Joseph Cabeling y Mongas, 37, baro, ken residente iti Barangay San Policarpo, Calbayog City, Western Samar.

Maipalagip a naggiinom ti suspek ken ti biktima iti asideg ti pugon ti maysa a Candido Bagnet ngem adda dida nagkinnaawatan.

Naggawid ni Asena ngem mapapati a sinurot ni Cabeling.

Mapapati a pimmidut ni Asena iti bato sana indisnog ken ni Cabeling ngem dina nadissuan. Idi naagaw ni Cabeling ti bato manipud ken ni Asena, daytoy ti indisnogna iti sumagmamano a daras iti ulo ti biktima.#