Nakadispley nga Amorsolo painting, dadduma pay, natakaw iti otel

VIGAN CITY – Sumagmamano a nakadispley a paintings iti maysa nga otel ditoy siudad a pakairamanan ti partuat ni nalatak a pintor Fernando Amorsolo ti naireport a tinakaw ti maysa kadagiti sangaili a nakatsek-in iti nasao nga otel idi malem ti Nobiembre 16.

Nagreport iti polis ni Dexter Franco y Palacpac, 28, naasawaan, residente iti Zone 3, Bantay, Ilocos Sur, ken security-in-charge iti Hotel Luna a maysa kadagiti sangaili ti otel a nabigbig idi agangay a ni Enrique Raymond Yap, 36, baro, negosiante, ken residente iti No. 9, Villamor, 2nd Street, Paranaque, ti nagmandar iti pannakaikkat dagiti naidispley a paintings ket pinaipanna iti kuartona.

Personal a nasaksian ni Gerald Battad y Reclamado, 24, baro, duty security guard ken residente iti Quimmarayan, Bantay, Ilocos Sur, ti mapapati a panangmandar ni Yap kadagiti kakaduana a maikkat dagiti paintings iti nakaidispleyanda.

Iti panangimbentario dagiti nagresponde a polis, naduktalan nga awan ti Juan Luna a painting ni Amorsolo, ti aramid ni Arturo Luz ken ti Cristal Carving nga inkitikt ni Ramon Orlina.

Iti inspeksion nga inwayat ti kapolisan nga indauluan ni Police Supt. Jugith del Prado, Hotel Engineer Edward Yu, ken Manager Dennis Duroja, ken ni Yap, nakitada dagiti mapukpukaw a painting iti uneg ti kuarto ti negosiante.

Naduktalan met dagiti personnel ti Hotel Luna a saan a naan-ano ti frame ti painting ni Fernando Amorsolo ngem awanen ti painting daytoy. nadadael ti frame ti sabali a painting, ken mapukpukaw ti displey a kitikit.

Idi napagsaludsodan ni Mariano Garcia, 43, naasawaan, residente iti Quezon City ken drayber ni Yap, impudnona a naikabil dagiti natakaw nga items iti shoulder bag ken travelling bag nga adda iti kotse ti negosiante.

Iti pannakaisurat daytoy, addan ni Yap iti kustodia ti polis ditoy bayat a maisagsagana ti tumutop a kaso maikontra kenkuana.#