Nakadungpar iti barangay captain, nakasuan

SANTA LUCIA, Ilocos Sur –  Naipilaan iti kaso ti maysa a lalaki gapu iti pannakadungpar ti maysa a barangay captain iti Barangay Barangobong ditoy nga ili idi Mayo 22 a nagtungpal iti ipapatayna.

Naipilaan ni Diosdado Sagay iti kaso a reckless imprudence resulting to homicide with damage to property iti provincial prosecutor’s office gapu iti panagdinnungpar ti luganda ken ni Cabaritan Barangay Captain Ronald Cortez iti sanguanan ti Eury Gasoline Station iti nadakamat a barangay.

Naitaray ni Cortez iti ospital ngem pimmusay kalpasan ti sumagmamano nga aldaw.

Gapu itoy, kinuna ni PSI Benedicto Cardenas, hepe ti polis ditoy, nga impilada ti kaso maikontra ken ni Sagay.#