Nakadungpar iti trabahador, saan a nakalusot iti dragnet operation

MAGSINGAL, Ilocos Sur – Babaen ti napartak a komunikasion, saan a nakalusot iti dragnet operation nga impasdek dagiti polis-Sto. Domingo ti drayber iti pick-up a nakadungpar iti maysa trabahador iti national highway sadiay Barangay Barbarit, ditoy nga ili idi sardam ti Marso 13.

Ti pay mangpadagsen iti kaso ni Sherell Pe Benito y Soliven, 55, balo, inhiniero iti Department of Public Works and Highways, ken residente iti Zone V, Bantay, Ilocos Sur, saanen a naidanon pay a sibibiag ti biktima ti pannungpar, maysa nga agnagan Michael Duldulao y Sunio, baro, trabahador, ken  residente iti nadakamat a barangay, idi maidanon iti Magsingal District Hospital.

Apaman a naawat ti  polis-Sto. Domingo nga indauluan ni Chief Inspector Honesto T. Lazo ti flash alarm nga impatulod Senior Inspector Jaime Navarro Laguesma, nangipasdekda iti checkpoint a nagresulta iti pannakasaed ti gray Mitsubishi Pick-Up Estrada a minaneho ni Pe Benito.

Impaima dagiti polis-Sto. Domingo ni Pe Benito ken ti lugan a nainbolbar iti pannungpar kadagiti polis-Sto. Domingo para iti umisu a disposision.

Naammuan iti inbestigasion a napaspas ti panagtaray ti Pick-up Estrada  nga agpaabagatan ket idi makadanon iti panipngeten a paset ti kalsada, mapapati a saan a nasiputan ni Pe Benito ni Duldulao a bumalballasiw iti kalsada ket nadungparna daytoy.

Gapu iti pigsa ti pannungpar, nagsagrap ti biktima kadagiti serioso a sugat iti nadumaduma a paset ti bagina ket awanen ti biagna idi dimmanon iti ospital.#