Nakagarut a kalding, naitaray

STA. CATALINA, Ilocos Sur – Nakagarut ti kalding ket ginundawayan metten daytoy a lalaki nga inlugan iti traysikelna sana inyawid iti kaserana.

Resulta: inaresto dagiti polis ket naipan iti police station agraman iti kalding a tinakawna.

Sakbayna, segun iti akinkukua a ni Lorenzo Raguindin y Raganit, 39, mannalon, ken residente iti Barangay Sinabaan, ditoy nga ili, naiwayway ti kaldingna idi malem ti Marso 7  iti uneg ti paraangan ni Henedino Reduca ngem nakabulos ti dingnguen ket nakaruar iti inaladan.

Mapapati a nakita ni Gilbert Avila y Alconis, 40, residente iti Barangay Sinabaan ngem aggigian iti Barangay Cuta, Vigan City, ti bulos a kalding ket tiniliwna sana inkarga iti traysikelna ken nagpakaskas nga immadayo.

Nupay nakita gayam ti akinkukua ti inaramid ti suspek, sana laeng inreport ti napasamak iti polis iti kabigatanna.

Natuntonan dagiti polis ti pagkaseraan ni Avila ket idi nangisayangkatda iti follow-up investigasion, nakitada ti kalding iti inaladan ti kasera daytoy.#