Nakagarut a kalding, napilidan

GALIMUYOD, Ilocos Sur – Nakagarut a kalding ti nakagapu ti pannakaaksidente ti agassawa iti kalsada a sakup daytoy nga ili idi malem ti Agosto 10.

Gapu iti aksidente, nadunor ti makannigid a tangan-saka ken nagarumiadan dagiti tumeng ni Benjamin Cudiamat y Molina, 45, mannalon; nagaradgadan ti makannigid a siko ken makannigid a tumeng ni baketna a Yolanda Cudiamat y Lupato, 43, ken nagaradgadan ti makannawan a siko, muging ken makannawan a pingping ti agtawen iti maysa nga anakda a ni Christian Jhay.

Naitaray dagiti biktima iti Galimuyod RHU sa naiyakar ti ubing iti St. Martin de Porres Hospital, Candon City.

Segun ken ni Cudiamat, agdaldaliasat ti  TMX motorcycle a minanehona iti kalsada a sakupen ti Barangay Rubio idi kellaat a bimmallasiw iti kalsada ti kalding ni Armand Millan y Agunan, 46, mannalon,  a puon ti pannakaatalna  iti animal ken nakaikrasanda a sangapamilia.

Kinuna met ni Millan a tengtenglenna ti tali ti kaldingna bayat nga uk-ukarkarenna ti tali ti sabali a kaldingna idi kellaat a ginuyod ti umuna a kalding isu nga inibbatanna ti tali tapno saan a mabaliktad ket maibbatanna ti ubbana a dua ti tawenna nga anakna.

Iti kaudian a report, naammuan a natay ti napilidan a kalding.

Ngem saan a nailanad iti blotter no pinauraga ni Millan ti kaldingna sana inikkan iti karne a pagkaldo dagiti nakadungpar iti tarakenna nga ayup.#