VIGAN CITY – Natay iti Gabriela Silang General Hospital ti maysa a lalaki a nakagat ti aso idi napan a tawen pay laeng.
Segun iti report, sakbay a natay ni Jerwel Pradas, taga-Puro, Magsingal, nagparang kenkuana dagiti pagilasinan a nakaptan iti rabies gapu ta nagtantanawtaw ken kinabutengna ti danum bayat ti pannakatamingna iti GSGH a nakaitarayanna.
Naammuan a nakagat ni Pradas iti aso idi Agosto 2013 ngem nagpatandok laeng ken saan a naindieksonan iti kontra-rabies.
Segun iti doktor, naladawen idi naitaray ni Pradas iti GSGH agsipud ta nagramaramen ti rabies iti bagina.#