Footer

Nakainom a mannalon, dandani nalmes

STA. CATALINA, Ilocos Sur – Baro a biag iti maysa a mannalon ta naisalakan sakbay ti pannakalmesna.

Nagasat ni Alvin Rabino y Rabino, 51, naasawaan, mannalon, ken residente iti Purok 3, Sitio Paratipit, Barangay Tamorong, ta nakita ni Melissa Barroga y Raras, 19, awanan asawa, agtagtagibalay, nga agtatapaw iti kabaybayan ken awanen ti puotna ket nagpaarayat.

Dagus a napan inalaw ni Redentor Rualizo y Manzano, 18, ken ni Marcelo Tab y Reoturio, 26, agpada a mangngalap ken lumugar ni Rabino sada impakatan iti first aid sakbay a naitaray iti St. James Hospital, Vigan City para iti pannakatamingna.

Sakbayna, nagginom ti biktima iti balayda sa napan naglangoy iti kabaybayan.

Mapapati nga inyagus ti koriente ni Rabino nga impataaw.#