Nakainom a motorista, nakadungpar

STA. CATALINA, Ilocos Sur – Mapapati nga adda iti inpluensia ti arak ti drayber ti motorsiklo a nakadungpar iti babai sadiay Barangay Poblacion ditoy nga ili idi sardam ti Agosto 4.

Immuna a naitaray iti Recel Clinic sa naiyalis iti Gabriela Silang General Hospital ni Marlene Santa Maria y Refuerzo, 52, naasawaan, ken residente iti nadakamat a lugar gapu kadagiti sugatna iti nadumaduma a paset ti bagina.

Naipan met iti police station ni Efren Rabara y Ragucos, 30, baro, residente iti Barangay Bayubay, San Vicente, Ilocos Sur, ken ti motorsiklona para iti pannakapalutpotna.

Iti panagimbestiga dagiti polis, agpalaud ti biktima idi dinungpar ti motorsiklo a minaneho ni Rabara, kasakayna ni Mark Anthony Ragandac y Ragasa, 22, baro, ken residente iti Barangay Poblacion, Sta. Catalina.

Mapapati a nakainom dagiti dua idi makadungpar ni Rabara.
Naammuan ti Tawid News a nagpapatangen dagiti agsumbangir a partido ket immabuloyda iti amicable settlement tapno saanen a dumanon pay ti kaso iti korte.#