Nakaruar iti July 2011 Nurses Licensure Examination, naiwaragawag

BAGUIO CITY – Agdagup iti 37,513 manipud iti 78,135 wenno 48% ti nakaruar iti July 2011 Nurse Licensure Examination (NLE) nga inangay ti Board of Nursing kadagiti nadumaduma a testing centers iti pagilian, daytoy ti impakaammo ti Professional Regulation Commission (PRC).

Kas sagudayen ti PRC Resolution No. 2004-223 a napetsaan iti Hulio 19, 2004, pinal ti resulta ti eksaminasion ket saan a maipalubos dagiti kiddaw para iti rekonsiderasion dagiti saan a nakaruar a grado.

Segun iti Baguio Regional Office, iti Baguio City, agdagup iti 2,639 manipud iti 5,352 (49%) nga examinees ti nakaruar iti eksamen; iti San Fernando (La Union), 1,247, manipud iti 2,648 (47%) ti nakaruar;  iti  Dagupan, 1,170 manipud iti 3,128 (37%) nga examinees ti nakaruar ken iti Cabanatuan, 771 manipud iti 2,049 (38%) nga examinees ti nakaruar.

Kabayatanna, kas intuding ti Commission Office Order No. 2009-90 a napetsaan iti Pebrero 19, 2009, agrehistro dagiti nakaruar a nageksamen iti Baguio, San Fernando (La Union, Dagupan ken Cabanatuan iti Baguio Regional Office.

Nupay kasta, tapno makainut dagiti nakaruar iti travel time ken mabusbos ken dida agdadarupdop iti Regional Office, agproseso daytoy nga opisina iti inisial a rehistrasion kadagiti sumaganad a testing center ken petsa:

1. Baguio: August 24, 2011 – onwards, Baguio Regional Office, Baguio City

2. Dagupan: August 26, 2011- San Carlos City Hall, San Carlos City, Pangasinan; September 9-10 – Philippine Medical Society Bldg. (near LTO), AB Fernandez Avenue, Dagupan City, Pangasinan; September 21, 2011 – Urdaneta City University, Urdaneta City, Pangasinan;

3. Cabanatuan: September 10-11, 2011 – Good Samaritan Colleges, Cabanatuan City, Nueva Ecija;

4. San Fernando (La Union) – September 2, 2011 – Candon City Hall, Candon City, Ilocos Sur; September 3, 2011 – Vigan Cultural and Trade Center, Vigan, Ilocos Sur; Maiwaragawagto – Laoag City, Ilocos Norte.

Pinalagipan pay ni Regional Director Teofilo Gaius M. Sison, Jr. a personal nga agrehistro dagiti nakaruar tapno makapagpirmada iti Roster of Registered Professionals ken kuyogda dagiti sumaganad: Duly accomplished Oath Form or Panunumpa ng Propesyonal; 2011 Community Tax Certificate (Cedula); 2 pedaso a passport-size a retrato (colored nga addaan puraw a background ken nametag); 1 piece 1”x1” picture (colored nga addaan white background ken nametag); 1 piece documentary stamp; Orihinal ken photocopy ti NSO Birth Certificate (original copy para presentasion laeng); ken Initial Registration Fee a P600.00 ken Annual Registration Fee a P450.00 para 2011-2014.#