Footer

Nakasalda nga ayat (Maikadua a paset)

Nupay dina koma kayat, pinalubosannak ti amak. Inlakona a kapilitan ti toro a kaldingmi tapno adda balonek.

Nagluasak a nagpasiudad nga imetko ti nabuslon a kararag a makasarakak iti pagtrabahuak tapno matun-oyak ti arapaapko a makaturpos iti kolehio.

Nagdagusak iti kasera ni Debra, maysa a gayyemko nga agtrabtrabaho iti maysa a pabrika ti sapatos. Nailet ti paggiananmi a kuarto, double bed ti pagiddaanmi. Isu ti akinngato, siak ti aggian iti baba. Pagbingayanmi ti upa ken iti magastosmi iti koriente ken danum.

Kinuyognak ni Debra iti pagtrabahuanna bareng adda pay bakante. Ngem daksanggasat ta addan nakauna kaniak.

Kadagiti simmarsaruno nga aldaw, inanusak ti nagbirok iti trabahok. Napalabas ti dua a lawas ngem awan met laengen ti mabirokak. Nagdanagak ta dandanin maibbus ti balonko a kuarta.

Pagyamanan ta nasayaat a pagayam ni Debra. Saanna nga inawat ti  pannakabagik iti kaserami.

“Sakanto laengen mangted inton adda mabirokam a trabaho,” nakunana.

“Kababain pay kenka. Amangan no mapadagsenanka iti kaaddak ditoy.”

“Asino pay ti agsinnaranay no saan a data nga aggayyem?” nakuna ni Debra.

Urayak la nakalua iti dayta a sinao ni Debra. Wen, nagasatak ta adda kas kenkuana a napudno a gayyem.

Intuloyko ti nagbirok iti trabahok. Maysa nga aldaw, adda nabasak a karatula a makasapul iti saleslady. Bassit laeng a pagtagilakuan iti sapatos ken aruaten. Dinagdagusko ti simrek iti uneg.

Naunget ti rupa ti balkat a baket a nagdamagak.

“Gusto mo pumasok tindera dito?” pinangato-pinababana ti panagkitana kaniak.

“Opo, maam,” nakunak.

“O sige, pasok ka na kung gusto mo ang tatlong libong sahod.”

“Tatanggapin ko, maam,” kinunak a dagus.

Nakaragragsakak a naggawid iti dayta a malem. Agpayso a bassit ti sueldo ngem ti importante, addan pagsapulak.

“Wen, anusam pay, pagur-urayanta bareng adda agbakante idiay pagtrabahuak,” nakuna ni Debra.

Nalag-an ti riknak kadagiti simmarsaruno nga aldaw. Uray kadarato bumugkaw ti baket nga akinkukua, kasla awan aniamanna kaniak. Uray kasano kaadu dagiti asikasuenmi nga aggatang iti tienda.

Alas sais ti bigat, rummuarakon iti kaserak. Agluganak iti dyip saak agsardeng iti Quiapo. Magmagnaakton nga agpa-Rizal Avenue. Asidegen ditoy ti pagtrabahuak.

Agmalmalemkami a nakatakder. Masapul a naisemkami latta a sumango kadagiti kustomer. Iti metten pagtagilakuan ti pangaldawan ken pangrabiianmi.

Pasado alas nuebe ti rabii no aggawidkami. Agalas dieston no makasangpetak iti kaserami.

Narigat ti sasaadek ngem inan-anusak bareng no makaurnongak. Ngem anian ta awan ti mabati iti sueldok gapu iti adu a paggastuak.Sumangkautro ta masansan nga agteks dagiti addik a masapulda ti kuarta a para iti panagbasada.

Naisennaayko ken ni Debra ti awan a maurnongko.

“Kayatko ti agadal tapno saannak lattan a saleslady,” nakunak. “Ngem awan met ti maurnongko a pagbasak.”

(Adda tuloyna)