Nakasuan, nanggandat biag drug surrenderee

SINAIT, Ilocos Sur – Napilaanen iti kaso ti dua a lalaki a nanggandat iti biag ti maysa a drug surrenderee idi rabii ti Agosto 11.

Kaso a frustrated murder ti naipila maikontra kada Joseph Mercado y Agdeppa ken Richie Ilustrisimo y Agdeppa gapu iti panangpaltogda ken ni Bernardo Ines y Sarabia, 31, residente iti Barangay Calingayan, Sinait, Ilocos Sur.

Iti inbestigasion, bayat ti kaadda ni Ines iti balay ti kabsatna a ni Grace Ilustrisimo, inayaban ni Dagul Ilustrisimo  nga agpatangda ken ni Mercado.

Idi makaasideg ni Ines, pinaltogan ti Mercado iti sumagmamano a beses ngem nakataray ti biktima a simrek iti balay.

Naglibas met ti suspek a naglugan iti motorsiklo.

Mapapati nga illegal drug trade ti ramut iti pannakagandat ti biag ni Ines.#