Nakemmeg a dua nga Amasona, nakasuan iti rebellion

TAGUDIN, Ilocos Sur – Dua a babai a maatap a kameng ti New People’s Army ti indatag ti PNP Cervantes ken ti 50th IB PA para iti inquest proceeding iti opisina ti assistant provincial prosecutor ditoy nga ili idi Oktubre 3.

Nainget ti escort a polis ken soldado da Joy Attiw y Ananayo, 22, balasang, residente iti Wangwang, Tinoc, Ifugao ken Lunesa Bonilla y Bawayan, 23,  balasang, taga-Mabalite, Tadian, Mountain Province, idi naidatagda idi agarup alas dos ti malem ti Oktubre 3 ken ni Assistant Provincial Prosecutor Arceli Perla B. Refuerzo para iti pannakaisaklangda iti kaso a rebelion.

Nakemmeg dagiti dua a nakalugan iti dyip iti impasdek dagiti polis ken soldado a checkpoint iti Cervantes idi agarup alas 9:00 ti bigat ti Oktubre 2.

Segun iti report, nakaluganan da Barangay Captain Nestor Padao ti Poblacion, Quirino, Ilocos Sur ken ni SPO2 Johnny Labiang, PNP member ti Quirino, dagiti dua nga amasona iti para pasahero a dyip nga agturong iti Cervantes ket inlimed nga inreport daytoy ti barangay captain iti police station ti Cervantes.

Dagus a nangipasdek dagiti polis ken soldado a kameng ti 50th IB PA iti checkpoint ket pinarada ti nagluganan dagiti suspek. Saanen a nakaliklik dagiti dua idi kemmegen ida dagiti otoridad.

Mapapati nga inannugot dagiti suspek bayat ti interogasion a kamengda ti grupo dagiti local communist terrorists a nakaengkuentro dagiti tropa ti gobierno iti Barangay Remedios ken Aluling iti Cervantes, Ilocos Sur idi Septiembre 23, 24 ken 26.

Maysa a soldado, ni PFC Jessie Camacho, ti nasugatan iti panagranget dagiti kameng ti PA nga indauluan ni Col. Nolie Enquillano ken dagiti sumurok kumurang 30 nga armado a tattao a local communist terrorists iti Sitio Paksao, Barangay Remedios, Cervantes, Ilocos Sur idi agsapa ti Septiembre 23.

Mapapati nga adda nagudas iti biang ti NPA iti ranget a nagpaut iti tallo nga oras kas maibatay kadagiti dara iti nakapasamakan ti engkuentro.

Nakarekobre pay dagiti soldado iti maysa nga M14 ken maysa nga M16 a napanawan dagiti nakarangetda.

Iti maikadua nga engkuentro a napasamak idi agarup 11:50 ti rabii ti Septiembre 25 iti nagbaetan ti 50th IB ken dagiti sumurok-kumurang 20 nga LCTs, nagudas ni PFC Benjamin C. Ventura, Jr.

Binigbig  met da Orlando Tibang y Golayat, barangay kagawad ti Tabakda, Tubo, Abra, ken dagiti miembro ti Abra Human Rights Alliance ken Human Rights Alliance of Ilocos Sur ti natay a rebelde nga NPA a maysa a Delfin Golayan aka Dindo, 32, baro ken residente iti Tabakda, Tubo, Abra.

Dua a mapapati a kameng ti NPA a residente iti Barangay Aluling, Cervantes, Ilocos Sur nga agnagan iti Francis Tengedan y Inali, 40, naasawaan, provincial checker (ENRMO) ken Mateo Sawey y Simongo, 28, mannalon,  ti inaresto dagiti soldado.

Napilaan metten iti kaso a rebellion iti opisina ti Assistant Provincial Prosecutor, Tagudin, Ilocos Sur da Edward Galao y Galleto, 30, baro, mannalon ken residente iti Sitio Cabaroan, Barangay Concepcion, Cervantes, Ilocos Sur ken Hilario Bantiwan y Waglan, 50, baro, mannalon ken residente iti Sitio Sisikan, Barangay Tabio, masuspetsa a local communist terrorists.#