Footer

Nakontra, pannakaipasdek ti cell site ti maysa telecommunications firm

VIGAN CITY – Iti baet a kumpleton dagiti dokumento ti maysa a telecommunication firm para iti aplikasionna a pannakaipasdek iti satellite cell site iti maysa a barangay ditoy, imbatad ti maysa a konsehal iti isusupiatna.

Kinuna ni Konsehal George Villanueva nga “adda sangaribu a rason” no apay a kontraenna ti pannakaipasdek ti Digitel Mobile Phil. Inc. (DMPI) Sun Cellular satellite tower iti Barangay Beddeng Laud ditoy siudad.

Ngem kinuna ni Konsehal Everin Molina, chairman ti committee on transportation,  nga iti “kapanunotak, adda met substantial a compliance kadagidiay requirements”, isu a pabor a maaprobaran ti nasao a resolusion.

Iti report ti komite, naidatagen ti nasao a kompania dagiti amin a dokumento  para iti pannakaipasdek ti cell site daytoy iti Barangay Beddeng Laud kas iti clearance  manipud  iti Air Transportattion Office, sertipikasion manipud iti DOH ken ti National Telecommunications Commission a mangibagbaga a saan a maapektaran dagiti electronic devices iti uneg ti pagtaengan dagiti residente  nga asideg iti tower kasta met ti rekomendasion dagiti opisial ti Beddeng Laud para iti pannakaipatakder ti nasao a cell site.

Ngem  kinuna ni Villanueva nga “adda rinibo a rason” no apay a  kontraenna ti pannakaipatakder ti SunCell satelllite tower, ket maysa ditoy ti  radiasion a mangapektar iti salun-at dagiti residente.

“…Kayatko koma a maammuan no ania ti epektona dagiti umad-adu a maipatakder a cell site ditoy,” kinuna ni Villanueva idinto nga innayonna “a panunotentayo koma ti masakbayan (ket) saan met a mabalin a patakdertayo a patakder (cell site) ta maapektaran ti salun-at dagiti kakabsattayo”.

Kinuna  ni Molina nga adda metten dagiti inaprobaran ti konseho a maipatakder a cell site ngem awan met ti timpuar a problema idinto nga inyunay-unayna a ti kompania ti agsungbat iti aniaman a damages wenno injury a patauden daytoy a cell site.

“…Pro-businesstayo, dagitoy ket improvement ti telecommunication ditoy heritage city a world class ket importante unay dagiti services dagitoy a cell sites,” kinuna ni Molina.

Nairekomenda ti pannakaadaptar ti report ti komite para iti pannakatratarna iti maikadua a pannakaibasana. (Karaman ti report ni Nemia Icari)