Nakumpiska a pirated DVD, fishing nets, pinuoran ti polis

CANDON CITY – Pinulpullo a nasamsam a pirated a DVD ken CD ti pinuoran dagiti city officials ken polis iti likudan ti city hall ditoy idi Disiembre 12.

Karaman a napuoran dagiti fishing nets a kinumpiska ti polis ditoy manipud kadagiti natiliw a nagisayangkat iti illegal fishing iti fish sanctuary ditoy a siudad.

Nasukalan dagiti fish wardens ti pannakaipakat kadagitoy a fishing nets iti fish sanctuary ket kinumpiskarda.

Maiparit ti panagkalap iti fish sanctuary iti Barangay Caterman ken Tamurong agsipud ta naituding dagitoy a lugar a pagtaengan ken pagitlogan dagiti lames.

Indauluan da P/Supt. Marlo Castillo, agdama a chief of police ti Candon, ken dagiti city officials iti panangidaulo ni Vice Mayor Nestor Itchon ti panangpuor kadagiti pirated DVDs ken dagiti fishing nets.

Kinuna ni Itchon a napainget ti kampania ti gobierno ti siudad kadagiti pirated a DVD nangruna dagiti naglaon kadagiti pornographic a mabuya agsipud iti dakes nga impluensiada kadagiti ubbing ken agtutubo.

Nangisayangkat ti polis ditoy iti operasion kadagiti puesto dagiti negosiante a Muslim iti tiendaan publiko ditoy a pakailaklakuan kadagiti pornographic a DVDs ken CDs agsipud kadagiti naawatda a reklamo manipud kadagiti residente.

“Maysa laeng ti mensahena daytoy… nga adda lintegtayo ket masapul laeng a mayimplementar,” kinuna ni Castillo.#