Nakuyem ti tangatang ita

Wen, Virginia, adda pay laeng isisingising ti init. Apay ketdin a saanen? Saan nga agnanayon a nakuyem ti tangatang.

Sumingisingto latta met ti init, makitamto inton dumteng ti sirnaat.

Saanka nga agbuteng iti idadateng ti sipnget, ta agmulagat ti init inton dumteng ti sirnaat.

Nasipnget dagiti isyo iti agdama. Ulsanda manen ti lubong. Kasla ulep ti narugit a pulitika a nangbalkot iti tangatang dagiti umili.

Dugudog ti pangtana. Flash flood ket adu dagiti maiyanud iti di maiparbeng ken di umno no di man mairaman a madidigra dagiti inosente. Magaburan iti pitak dagiti rumbeng ken prioridad koma nga aramiden para iti dur-asan ti sapasap. Maiyanud iti narungsot nga agus dagiti daan a kari tapno sumangbay manen ti sabali pay a kari no di man isu nga isu a kari. Saan a maliklikan ti pannakaipasir kadagiti buya a saantayo koma a kayat a mapasamak. Dagiti buya a saan koma a nasken a mangkigtot ken mamutbuteng. Saan a maiparbeng a dagitoy ti maisubo ken maiduol kadagiti naganus pay nga isip. Ngamin, no ania ti makita, isu met ti tuladen dagitoy a saringit. No makitada a nakaay-ayat wenno maayatanda la unay iti mapaspasamak iti las-ud a dida pay la maawatan ti kinapudno ken no matiliw ti interesda kadagiti pinniltakan iti rupa ken pinnabangsit iti nagan, di masasaan nga aramidendanto met dayta a banag. Kaay-ayodanto daytoy.

Agsipud ta dida pay maawatan dagita, agpisawpisawdanto, saandanto a mamingga a mangkutikot iti pakabuklanna, agingga nga agbalindanto met a tradisional a makibarbarsak, makipinnalapal. Maibilangdanto met a disipulos dagiti ubbaw a garakgak. Karamandanto kadagiti di makadlaw iti ilalabas ti lalaki a naamitan iti oras.

Wen, Virginia, nakuyem ti tangatang, lalo iti Mayo. Dumteng ti katawa dagiti nagballigi: dagiti tinalek ken intalek ken pinilit a tinalek; dagiti nagsaur ken nagaramid iti madyik tapno maguyodda a tugawan ti trono; naisem pay dagiti nakaliksab kadagiti nabagas unay: dagiti naugingan a nagiggem iti banga, dagiti nangilako iti anniniwan ti sabali, dagiti nagtured a nangallilaw kadagiti bullagaw.

Nakuyem ti tangatang ti sumungad a Mayo, gapu kadagiti saning-i dagiti saan a nagballigi: dagiti talaga a di kayat dagiti umili a pasalsali; dagiti mamati la unay iti bagida a maallilawda ti utekmo, Virginia; dagiti awanan iti karbengan nga agserbi ta makitan dagiti umili ti agsarsarwa a bulsada idinto ta agmalmalangaka pay laeng kadagiti naipuruak a kari; dagiti ikkis dagiti di makaawat ken dida kayat nga awaten a saanda a nagballigi, ngamin, kayatda a subboten ti dakkel unay a nagastosda; dagiti mangipagarup a sinuitik ti kasalisalda. Manayonan manen ti bilang dagiti matmaturog ken binuot a kaso iti sala ni torogis, ken ad-adu manen ti makiraud a pagbagasan, saan laeng a ti napno ti kamaligna no di pay makadkadan met ti agamang ti ili.

A, nakuyem ti tangatang ti Mayo ita, Virginia. Wen, makitam ita dagiti nasasam-it a dila. Makitam ita dagiti magmagna a bullagaw nga umasideg a kunam la no am-ammodaka: makilamano, makisarsarita,makiinnangaw ken makirikrikna iti agdama a rikriknaen. Umayda, wen,bumalaybalay, isuda dagiti balangkantis a propeta, ta ti asukar nga agaon kadagiti bibigda ket agbalin nga apro apaman a naidisso iti dilam. Umayda agwagis ken makilamano kadagiti kalkalsada: laglagipennakto, kayong; ne, kasinsin, dinakto liplipatan; dagitay inanaktan ti kasar ken buniag dita, kumpadre ken kasta met kumadre, bagaam idan a dida isabali pay ti ikur-itda ta ad-adda a datayo ti agsisinnaranay; anakek dayta ubbam ta kuak ti maysa a baboy ken agayabka iti ad-adu nga umay makipunsion; siak ti ninong (wenno ninang) ta iserrekkonto ida no makatugawak. A, nagadu dagiti kari ken nagadu met dagiti agam-ampayag a kali.

Wen, Virginia, nakuyem ti tangatang ita, ket intay manen asaken dagiti kinelleng, intay manen pilien dagiti bin-i a kapkapnekan: dagiti bin-i iti nasiit ken nabato a daga; dagiti adda iti igid ti kalsada; dagiti nagtubo iti abay dagiti nadadangkaw a ruot. Isu a napateg la unay tunggal inka ikur-it: ta dayta ti masakbayam, ti dara ti ilim, ti pataw iti saanen a pannakalung-aw, urbon ti karnero a mangirugi iti nasged a panagbalbaliw saan laeng iti ili no di pay ulidan dagiti umili.

Saantayo koma a makiraman kadagiti makipagparti iti bukod nga ili: natingra dagiti dara, maitaray dagiti naalas-as a lasag. Saantayo a makipunsion kadagiti nangisit a gagem.

Wen, Virginia, sumirnaat pay ti init. Ngem nasken nga utobem a nalaing ti konsensiam sakbay a mangikur-itka. Saanmo nga ilako dayta karbengam. Saanka a paallilaw kadagiti inasukaran a balikas.

Nakuyem ti tangatang, lalona iti Mayo, ngem iggemtayo ti lampara ti masakbayan.