Nalaing a kumabit ni politiko kadagiti saanna a proyekto

Itay nabiit, nangipaulog ti Department of Interior and Local Government iti memorandum circular a naiturong kadagiti amin a gobernador, city ken town mayors, regional directors ken dadduma pay a maseknan a mangiparit iti pannakaidispley dagiti ladawan ken nagnagan dagiti opisial ti gobierno kadagiti karatula ken paskin a mangiwarwaragawag iti programa ti gobierno mainaig iti kontra-kinapanglaw.

Kas kuna ni DILG Secretary Jesse Robrero iti panangipaulogna iti Memorandum Circular 2012-44 a napetsaan iti Marso 6, para iti “nasayaat a panangituray, transparensia ken akauntabilidad”.

Iti sabali a bangir, maysa met a gakat ni Sen. Miriam Defensor-Santiago ti mangiparit kadagiti opisial ti publiko iti panangikabilda iti nagan ken retratoda kadagiti billboards a mangiwarwaragawag kadagiti proyekto inprastruktura.

Kinapudnona, nabayagen a mababbabalaw dagitoy nga aramid dagiti politiko ken dagiti opisial dagiti nadumaduma nga ahensia ti gobierno.

No adda dagiti maipatakder a pagadalan, maaramid a kalsada, irigasion, ken dadduma pay a proyekto, adda  metten a maipatakder ti karatula nga agkunkuna a proyekto daytoy ni kastoy a politiko uray no awan met ti pannakaibiangna iti pannakapaadda iti daytoy a proyekto, maited metten ti kredito kenkuana ken agparparang metten a kasla nagtaud iti bukodna a bulsa ti maaramid a proyekto uray iti kinapudnona a kuarta dagiti umili ti nagtaudan ti pundo.

Husto ti kinuna ni Senador Santiago nga ipromot daytoy nga aramid ti kultura ti political patronage ken korapsion, malaksid laeng a nakaro a kaawan iti etika ti pannakailanad ti ladawan ken nagan ti politiko iti nasao a proyekto.

Maysa ketdi a panangallilaw kadagiti tattao agsipud ta ti kinapudnona, saan a nagtaud iti bulsa ti politiko ti nasao a proyekto no di kuarta dagiti umili ti nagtaudan ti pondo. Panangallilaw kunami ta maipromot ti imahe ti politiko a kas nagaget a public servant, ket iti masansan a pannakakita ti nagan ken ladawanna kadagiti proyekto, matandaanan la ketdi dagiti tattao a makalabas ken makabasa kadagiti naipatakder a karatula ti “proyektoda” a dakkel ti agbalin a bentaheda iti eleksion.

Suportado ti Malakaniang ken ti Catholic Bishops Conference of the Philippines – National Secretariat for Social Action daytoy a gakat ni Sen. Santiago. Kasapulan met a suportarantayo daytoy a gakat bareng no naannayas ti ilulusotna iti Kongreso a di ket ipasuli dagiti manangallilaw nga agilinlinteg aglalo dagiti sadut a politiko nga awan ti maidatagda kadagiti tattao a gapuananda ngem alistoda a mangipasngat iti nagan ken retratoda kadagiti karatula wenno paskin dagiti proyekto iti distrito, probinsia wenno ilida nga awan met ti pannakaibiangda.#