Nalaing nga agbayad a kameng ti natengan a nalaing, mapabulodan manen

CABUGAO, Ilocos Sur – Napagkaykaysaan iti miting ti Cabugao Vegetable Growers and Producers’ Association a mapabulodan manen dagiti kameng ti asosasion a nakaungpot a nagbayad iti sinublatda a pondo itay napalabas a panagnanateng.

Iti emerhensia a miting ti nasao nga asosasion dagiti natengan ditoy nga ili a naangay iti maikadua a kadsaaran ti municipal building ditoy nga ili idi Nobiembre 18 babaen ti panag-preside ni Armando Azcueta, presidente, napagkaykaysaan ti pannakaipalubos manen ti ibubulod dagiti nakabayad a kameng ti asosasion babaen ti relending scheme para iti panagnanateng manipud Nobiembre 2014 agingga inton Mayo 2015.

Naanamongan pay iti nasao a miting a maikkan dagiti kameng nga adda pay balansena iti promisssory note no kaano ti deadline ti panagbayadda.

Maysa pay a natratar ti pannaka-update ti financial record ti asosasion ken dadduma pay a problema dagiti miembro pakaseknan iti panagnegosioda iti nateng.

Maipalagip a kas paset ti programana a mangpadur-as iti vegetable production, pinasublatan ti lokal a gobierno nga idadauluan ni Mayor Edgar S. Cobangbang, Jr. iti pondo ti asosasion tapno adda maited a pagpuonan dagiti vegetable growers ditoy nga ili.#