sinursuran-banner-sqSinursuranNi Jobert M. Pacnis

Nalaka nga Agas iti Sagubanit?

Sinursuran: Kolum ni Jobert M. Pacnis
(Maudi iti dua a paset)

Uray agkaruotan ti boksit saan la ketdi nga agsaksakit.”
Ti dakesna, satayto la ammo nga ipateg ti salun-at inton addan marikrikna a ganna daytoy. Inton addan ti maintenance-tayo nga agas.

Husto koma no inan-annadak idi ti bagik, kunatayto. Ngem naladawen. Agbibiagtayon iti babaen dagiti agas nga inaldaw nga ipaunegtayo. Ket daytoy ti mangipababa kadatayo.

Ti nakakalkaldaang ditoy, uray gayam dagiti agas, saanen a natalged. Adun ti peke kadagitoy. Kas iti report kabayatan a masursurat daytoy. Adu kano ti nagpukaw nga agas a para iti maintenance iti sakit ti puso. Nagtaud dagitoy iti pagilian ti Pakistan. Nai-hold iti maysa nga ahensia ti gobierno ta mapagduaduaan ti kalidadda. Yanna nga adat, kellaat lattan a nagpukaw dagitoy.

Kuna dagiti otoridad, mabalin a naideliberen dagitoy kadagiti probinsia aglalo kadagiti babassit a botika.

Dakkel a disgrasia no kasta. Imbes a makatulong kadagiti adda sagubanitna, mabalin a pakaruenna ti an-annayenda.

Ket biag daytan!

No apay ket ngamin a “kellaat lattan a nagpukaw” dagitoy agpateg iti riniwriw a pisos nga ag-agas. Ket adda payen iti ikub ti ahensia ti gobierno!

Der’s samting pisyi, kuna man dagiti mannukmon a lallakay.

Isu a kadagiti agme-maintenance iti para iti sakit iti puso, kitaenda koma a nalaing ti gatangenda nga agas ken no paggatanganda kadagitoy. Saan a gapu ta nakadamagda iti nalaklaka a kapareho iti tomtomarenda, ali, isu metten ti gatangenda.

Agpanunotda koma iti maminribu.

Wen, kuna dagiti otoridad, kaarngi dagitoy nga agas dagiti adda iti merkado. Gayang-gaya ang original. Laeng, mailaklako iti nalaklaka a presio tapno makaawis kadagiti kostumer ket nalaka laeng met a maibus.

Ngem, ne, agannad laeng ta mapagduaduaan ti kalidad dagitoy. Nalaka nga agas iti sakit ti puso? Ay, laklakaenna gayam ti biagtayo!

Annad iti amin nga annad ti kasapulan.

No agnanayon met a kastoy ti panagbanbantay dagiti maseknan nga ahensia, saan a karkardayo a dakkel ti malugi iti gobierno. Patayenna dagiti lehitimo a negosio.

Iti agdama a liderato ti pagilian, siputanda koma dagiti kakastoy a kaso saan laeng a dayta panagpipinniltakda, aglalo ta umadanin ti eleksion, ti adda iti adyendada. Laglagipenda koma ti akemda a mangkita, mangbantay iti pagimbagan dagiti tao a nangipatugaw kadakuada.

Saan a kastoy a mapagam-amkan ti pannakaipisok iti peligro dagiti kailian gapu iti panagliwayda kadagiti obligasionda.

Saan a kasapulan ti Pinoy dagiti kas kadakuada a lider.

Ad-adda a saan a masapul a maisakripisio dagiti kadaraan gapu laeng iti sileng ti pirak.

Ta kas kuna met laeng dagiti mannukmon a nataengan: “Pera-pera la dayta, barok!”

Nagsakit daytoy a kinapudno iti sosiedadtayo. Nagbalinen a paset ti kultura?

A di koma rumbeng!

Ala, pagyamantayo ketdi ta narekober met laeng dagiti nasao nga agas. Kuna ti ahensia (Bureau of Customs) a nagpukawan dagitoy, siguraduenda nga adda agsungbat iti napasamak. Ta dakkel a panangibabain ti inaramidda/inaramidna iti ahensia.

Nasayaat la unay no kasta. Masapul a talaga ti naan-anay a panagdalus kadaytoy nga ahensia. Ta pagaammotayo met nga adun a report ti nangmantsa itoy. Iti kallabes, naipan iti hot seat gapu kadagiti nadumaduma nga isyu nga adda pakainaiganna iti kunniber/panagkunniber.

Malagip a naglusulos iti takem itay nabiit ti kangatuan nga opisial ditoy ta “saanna kan’ a kabaelan ti pressure iti uneg.”

Ngem sabagay, adda pagsasao a no nagtaray ti kabalio, urayen ta agsardengto. No kaano nga agsardeng dagitoy a kabalio, dayta laeng ta ditayo ammo. Ti sigurado, agsardengdanto.

Idawdawattayo laengen a mapasamak koma dayta iti kabiitan a panawen. Saantayon nga agsaosao pay ta amangan no mahaybladtayo. Umadu pay ti kostumerda!

Napia koma no isuda ti mahayblad ta adu igatangda iti agas.#