Naliday dagiti malem iti Burnham Park

Sarita ni Salvador A. Espejo

(Maikadua a paset)

 

“NAUNEG nga Iloko dayta, a,” nakuna ni Angelica.

Nagkatawa ni Maribeth iti namaga.

Immaweng ti pagorasan iti diding. Alas saisen.

“Innakon,” timmakder ni Angelica. “Dumaw-asak pay iti tiendaan gumatang iti lutuek a pangrabiik.”

“Mangrabii ken umianka ditoyen,” kinuna ni Maribeth. “Awan ti kapatpatangko.”

“Apay a dimo ayaban dagiti babaknang a pagayammo? Inkayo agbuya iti sine wenno agjamming iti Bistro.”

“I prefer your company. Sinseroka, saan a kas kadagiti nadennaak a ti la pagimbaganda ti nasken kadakuada.”

Saanen a nakapagkitakit ni Angelica.

Pimmalasio ti pagtaengan a simrekan ti kotse ni Maribeth. Nalawa ti paraangan a nadarnapan iti berde a ruot ket mulmula.

Pinaisagana ni Maribeth iti babaonen ti pangrabiida. Nabaknang ti pangrabii a naidasar iti lamisaan. Dakkel ti tig-ab ni Angelica iti bussogna.

“Nakitamon ti kinarawetko,” kinuna ni Angelica. “Siguro, dinak mapiduan nga awisen!”

“Dayta ti magustuak kenka!” kinuna ni Maribeth. Nagkatawada.

Inserrek ni Maribeth ni Angelica iti kuartona kalpasan ti panagpalpada. Ad-adda manen ti panagraem ni Angelica idi makitana ti dakkel a pagtokaran, 32” a telebision,  ken  nalawa ken dekutdon a katre. Limmanlan ti apalna ken ni Maribeth.

Linuktan ni Maribeth ti kabinet ket nangiruar iti naingpis a pagturog. Pinaisuotna ken ni Angelica. Agkabagbagi da Angelica ken ni Maribeth ket dimket kenkuana.

“Kaanonto met iti panna-katagikuak iti kastoy?” kinuna ni Angelica idinto a nagpuligos iti sango ti tokador.

“Kukuamon!” kinuna ni Maribeth. “Uray ket diak us-usaren.”

Adu ti sinaludsod ni Maribeth maipapan iti away a dimmakkelan ni Angelica.

“Naragsak kadi ti biag iti away?”

“Ania met, rigat lat’ adda,” insungbat ni Angelica.

“Kayatko a padasen ti umay aggian iti away. Naragsak siguro ti mangged babaen ti panagpatedted iti ling-et.”

“Nairuamka iti nam-ay. Ay, dimo maanusan ti agmalmalem iti kapitakan ken kainaran.”

“I am really serious, Angelica. Naumaakon iti siudad. I need a change of atmosphere.”

“Agbakasionak iti mabiit,” nakuna ni Angelica. “Kayatmo ti kumuyog? Ngem ita pay, ballaaganka. Sabali ti bakasion iti away. Maigubetka iti trabaho.”

PINARA ni Angelica ti bus iti nagkurosan. Dimsaagda ken ni Maribeth. Agur-urayen ni Ama Andres, ti ama ni Angelica, iti sirok ti narukbos nga akasia. Inyam-ammo ni Angelica ni Maribeth iti amana.

“Naimbag man, balasangko, ta mayanusmo ti umay agbakasion iti nanumo nga awaymi,” kinuna ni Ama Andres.

Impako ni Ama Andres ti baka iti karison. Insimpa ni Angelica ti gargaretda ken ni  Maribeth. Tinulonganna ti gayyemna a simmagpat.

Nupay agkarataltag ti karison tunggal maikabsiw ti pilid iti bato, di nangeg ni Angelica a nagriri ni Maribeth. Napaisem ni Angelica. Baka agbabawi itan ti gayyemna no apay a simmurot nga agbakasion iti awayda.

Dandanin sumipnget idi dimtengda iti away. Nagmano ni Angelica iti inana. Inagkan met ni Maribeth ti pingping ti baket.

“Sika gayam ni Maribeth,” kinuna ni Ina Imang. “Masansan a dakamatennaka ni Angelica iti suratna. No awanka, kapilitan la ketdi a nagsardeng ti balasangmi nga agbasa. Dikam’ makasubsubalit iti kinaimbagmo, nakkong.”

“Sino pay ti agbinnadang no di dakami, nana?” kinuna ni Maribeth.

Pinarti ni Ina Imang ti dumalaga a manokda ket linaokanna iti bulong ti marunggay. Nagpakbet pay ket insagpawna ti tinuno a paltat a nalawinan ni Ama Andres idi naminsan a rabii iti karayan.

“Ipabpabalaymo, balasangko,” kinuna ni Ama Andres idi mangrabiida.

“La ketdi, Tata,” insungbat ni Maribeth.

Nagkammet ni Maribeth. Kinantiawan ni Angelica ti appigud a pannangan ti pagayamna. Ketdi, adu ti nakan ti pagayamna. Nagkakatawada idi nagtig-ab iti napigsa.

Nagpalpaanda ti nagtutungtong iti sirok ti mangga. Namituen ti langit. Makapasalibukag ti puyupoy.

“Kumusta ti panagadalyo?” inamad ni Ama Andres.

“Kaasi ti Dios, nairuarko met dagiti asignaturak, amang,” kinuna ni Angelica.

“Sigurado a mapadayawan ni Angelica no agturpos, tata,” kinuna ni Maribeth. “Nangangato dagiti gradona, saan a kas kaniak a kasla nagdalupisak a nuang ti kababa dagiti gradok.”

“Dimo patpatien dayta, amang. Nangato ti gradona,” impasngat ni Angelica.

“Nasayaat, a. Ipasnekmo ti agadal. Uray dayta laeng ti maipatawidmi kenka,” kinuna ni Ina Imang.

Di mabayag, immulin da Ama Andres ken Ina Imang tapno aginanada. Imbaga ni Ama Andres a masapada  nga agpatalon ta irugida ti aggapas.

Simmaruno da Angelica ken Maribeth. Agkaiddada iti nailet a kuarto ti balasang.

“Pasensiakan ta natangken ti papag,” kinuna ni Angelica, “saan a kas iti pagturogam a nalamuyot ti kutson.”

“Uray ket presko ti angin,” kinuna ni Maribeth.

“Ken maduayyaka iti stereophonic dagiti andidit ken kuriat,” inkatawana.

Agarup ala una ti parbangon idi malukagda iti kurengreng ti gitara. Madamdama, naipatayab ti agun-unnoy a kanta ni ayat.

“Ania daydiay?” kinalbit ni Maribeth ni Angelica.

“Adda agtapat,” inyarasaas ni Angelica. “Nakaugalian ditoy away a tapatan dagiti babbaro ti sangsangaili a balasang.”

“A-ania ti aramidek?” marakattot a bimmangon ni Maribeth.

“Agsukatka. Kababain no dita paulien ida,” insungbat ni Angelica.

(Adda tuloyna)