Footer

Naliday dagiti malem iti Burnham Park

Sarita ni Salvador A. Espejo

(Maudi a paset)

 

 

Ginangtan ni Angelia ti pagsilawan ket intan-awna. Nailasinna dagiti kapatadanna.

“Dakayo gayam, Ben ken Aldong,” kinuna ni Angelica. “Umulikayo.”

Rimmuar da Angelica ken ni Maribeth iti siled. Inyam-ammo ni Angelica ni Maribeth.

Rimmuar ni Ama Andres. Nagdaydayawen dagiti babbaro.

“Nakalagipkayo man a pimmasiar,” nakuna ni Ama Andres.

“Naipalais ngamin kadakami ti nabanglo nga ayamuom ti maysa a sabong a simmangbay iti nadayaw a balayyo, tata,” arindaniwen nga insungbat ni Ben.

“Wow! Mannaniw gayam ni Mang Ben,” kinuna ni Maribeth.

Saan nagbayag a nakitungtong ni Ama Andres. Immuneg iti sagumbi.

Kinurengreng ni Aldong ti gitara. Kiniddawna ti panagkanta ni Maribeth.

“Awan ammok a kanta ti away,” nakuna ni Maribeth.

“Uray ania, saan la ketdi dagiti agbirbirakak a kanta,” kinuna ni Aldong.

Namadayaw ni Maribeth. Idi la a maammuan ni Angelica a napintas ti boses ti gayyemna.

“Naduayyaak ‘ya,” kinuna ni Ben. “Kasla timek ti anghel manipud iti langit.”

“Hus, bolero gayam ni Mang Ben,” inkatawa ni Maribeth.

Agtaraoken dagiti manok idi agpakada da Ben ken Aldong. Inyawisda kada Maribeth ken Angelica ti panagtunoda iti mais iti linapogan ni Aldong.

“Naragsakkayo gayam ditoy,” kinuna ni Maribeth idi agiddadan ken ni Angelica.

“Dayta laeng ti maipag-pannakkelmi ditoy away,” kinuna ni Angelica.

“Baliktad ti lubong!” kinuna ni Maribeth. “Napanglawkayo ngem naragsakkayo. Aglaplapusanankami ngem nalidaykami.”

INYANGAD ni Angelica ti rupana. Makasiniten ti darang ti init. Tinaliawna ni Maribeth. Kasla di mabannog ti gayyemna nga agitar-ap. Lumablabbasit dagiti pingpingna.

“Isardengyo pay ta mangaldawtayon,” inyayab ni Ina Imang.

Pusi a nalaokan iti paria, rangaw ti karabasa a nasagpawan iti tinuno a dalag, kamatis a nabugguongan ti naidasar iti datar ti abong-abong. Nagdalupisakda a nangaldaw.

“Adun ti ngimmisitan ni Maribeth,” inrabak ni Ama Andres. “Amangan no dinaka malasinen ti agdatdaton kenka.”

“Uray ania ti langak, no nadalus ti tarigagayna, ayatennak latta, saan kadi, nana?” tinaliaw ni Maribeth ni Ina Imang.

“Pudno ‘ta kunam, balasangko,” inyayon ni Ina Imang. “Ayatennaka ta sika ti sika.”

“Ngem ni nanam, inayatnak a diak nagdaton kenkuana,” kinuna ni Ama Andres.

“Dika la mabalin!” inkusilap ni Ina Imang. “Ti kunam ketdi, arem-mata, bain-baga!”

Nagkakatawakami.

Idi makapalpada, intuloyda ti nagitar-ap. Sumipngeten idi aggawidda. Naglugan da Angelica ken Maribeth iti pasagad.

Nadlaw ni Angelica ti kinaulimek ni Maribeth idi mangmanganda. Nagtarus iti siled apaman a naiwarsina ti buggona. Saanen a rimmuar.

“Kitaem man ‘diay gayyemmo, amangan no agsagubanit,” kinuna ni Ina Imang.

“Immuneg ni Angelica. Nadatnganna a nakapannimid ni Maribeth iti tawa. Adayo ti turong dagiti matana. Naliday ti rupana.

“Mailiwkan iti napanawam a cat?” inyangaw ni Angelica.

“Aggibusen ti bakasionko,” kinuna ni Maribeth. “Agawidakon.”

“Dika kad’ maragsakan? Makadennam manen dagiti dadakkelmo.”

“Makaparagsak kadi ti masansan a panagmaymaysak?”

“Dika maawatan,” nasdaaw ni Angelica.

“Ni Papang, ti la negosio ti as-asikasuenna. Ni met Mamang, iti la madiongan ti ayuyangna. Awan kanitoda para kaniak.”

Saan a nakatimek ni Angelica.

“Manipud kinaubingko dagiti babaonen ti kadkaduak. Agpayso, itedda amin a kayatko. Ngem nalibtawanda a kasapulak met iti pammateg!”

Nawagwag ti abaga ni Maribeth. Inarakup ni Angelica. Binay-anna a nagsangit ti gayyemna iti abagana.

TINULONGAN ni Angelica ni Ama Andres a nagidissaag kadagiti gargaret ni Maribeth. Dandanin agrubbuat ti bus nga agpasiudad.

“Innakon, tata, nana,” impakada ni Maribeth. “Agyamanak unay. Dikayto malipatan. Pinaragsakyo ti bakasionko.”

“Dios ti kumuyog, anak,” kinuna ni Ina Imang.

“Nagasatka, Angelica,” kinuna ni Maribeth. “Adda dadakkelmo a mangipatpateg kenka.”

Nagandar ti lugan. Impukkaw ti konduktor ti ilulugan dagiti pasahero.

Inarakup ni Maribeth ni Angelica. “Umayakto manen, a?” kinunana.

“Silulukat ti balaymi kenka, Maribeth,” insungbat ni Angelica sana pinisel ti dakulap ti gayyemna.#