Naliday dagiti malem iti Burnham Park

Sarita ni Salvador A. Espejo

(Umuna a paset)

 

MALEM. Dandanin agtabon ti init ket mangrugin a kuminnit ti lamiis. Ngem saan nga intaltalek ni Angelica ti salemsem. Adayo ti yuyeng ti panunotna. Inton bigaten ti panageksamenna ngem awan pay naawatna a paw-it dagiti dadakkelna. Addan iti maudi a tukad ti kinamaestra iti Baguio Colleges Foundation.

Maburiboran unay ni Angelica ket dina nadlaw a naka-danon gayamen iti barandilias a kumamang iti dan-aw. Immanges iti nauneg idinto nga impalladawna ti panagkitana iti dan-aw a pagbibilogan ti sumagmamano a turista. Insangbay ti pul-oy ti garikgik dagiti agbilbilog.

Immanges manen iti nauneg. Pangalaanna ti pageksamenna? Iti surat ti amana, pinadasna kanon nga inasitgan dagiti kalugaranna tapno umutang para iti kasapulanna. Ngem kas kenkuana, karigatda met. Dakkel ngamin ti pukawda itay a panagtatabako ta nasapa a dimteng ti tudo a nangdadael kadagiti mulada a tabako.

Dina nadlaw a nakadanon iti sementado a pagtugawan a mangtantannawag iti dan-aw. Nadungparna ti nakatugaw a babai.

“Dispensarennak,” kinuna. “Diak inggagara.”

“Awan aniamanna,” insung-bat ti babai. Ti kinaliday dagiti mata ti babai ti umuna a nakaawis iti imatang ni Angelica.

Indiaya ti babai ti tugaw sana inyam-ammo ti bagina. Maribeth ti naganna. Nagtaud iti maraem a pamilia Suarez iti siudad ti Baguio. Negosiante ti amana idinto a nalatak iti gimong ti inana. Addan iti maudi a tukad ti Medisina iti St. Louis University.

“Uray dimo ibaga, ammok no apay nga addaka ditoy,” kinuna ni Maribeth. “Adda dakkel a problemam, saan kadi?”

“Kuarta ti parikutko,” insungbat ni Angelica. “Maburiborannak ta eksamenmin no bigat ket awan pay ti pagbayadko.”

“Matulonganka,” kinuna ni Maribeth. “Pasublatanka. Mano kadi ti masapulmo?”

“Kababain kenka. Ita la a nagam-ammota,” insungbat ni Angelica.

“Ibilangnak koma a nabayagen a gayyemmo,” pinisel ni Maribeth ti dakulap ni Angelica.

“Diak maipanamnama a mabayadak iti mabiit. Nanumo laeng a mannalon ni amang.”

“Dimo panunoten dayta. Ti nasken, makapageksamenka.”

Linuktan ni Maribeth ti bagna. Nakigtot ni Angelica idi yaonna ti sangabungkong a kuarta. Nangdutdot iti lima a sagsangaribu.

“Umanay daytoyen?” ina-madna sana impapetpet ti kuarta idi agkitakit ni Angelica.

Dayta ti nangrugian ti kinadekket da Angelica ken ni Maribeth. Manipud idin, masansan a dagasen ni Maribeth ni Angelica iti pagdagusanna tapno kaduaenna nga agpasiar. Adda kabukbukodan a kotse ni Maribeth.

No dadduma, sumken ti panagbain ni Angelica ta di itulok ni Maribeth nga aggasto. Ap-apalanna ti kinalabon ti maiggaman a kuarta ni Maribeth.

Maysa a malem kalpasan ti maudi a panageksamen ni Angelica nagturong iti Burnham Park tapno lumang-ab iti nadalus nga angin. Nadatnganna ni Maribeth iti disso a nagam-ammuanda. Adayo ti yuyeng dagiti naliday a matana, nakamulengleng iti dan-aw a pagbibilogan dagiti agayan-ayat.

“Nauneg sa ti pampanu-notem,” kinuna ni Angelica.

“Sika gayam,” kinuna ni Maribeth. Napilpilit ti isem a simngay iti bibigna.

“Mariknak ket nalidayka. Adda problemam?”

“Personal a banag,” inwang-it ni Maribeth ti buokna, “but I can manage. Ngem apay a dayta ti panunotenta? Intan ‘diay balay. Kaduaennak, mabalin?”

Immabuloy ni Angelica yantangay naiwakasnan ti eksamenna. Nagluganda iti kotse ni Maribeth.

Napasagawisiw ni Angelica idi dumap-awda iti pimmalasio a balay da Maribeth. Ad-adda manen ti panagraemna idi tumadogda iti nadaeg a salas. Agkakangina dagiti alikamen.

“Ipabpabalaymo,” kinuna ni Maribeth. “Duduata ditoy balay.”

“Dagiti dadakkelmo?” inamad ni Angelica.

Kinuti laeng ni Maribeth ti abagana. “Adda kumperensia a dinar-ayan ni Papang idiay Cebu. Dinagas met dagiti amigana ni Mamang. Adda konsiertoda iti madiong. Rabiinton no sumangpetda.”

Inayaban ni Maribeth ti babaonen ket nagpayuneg iti paglamiis. Linuktanna ti stereo sa nagpatokar. Naipalais ti agun-unnoy a boses ni Barbra Streisand.

Nagturongda iti balkon. Manipud iti nagtugawanda, matannawaganda ti napintas a buya ti siudad. Makapasalibukag ti pul-oy.

“Nakaap-apalka, Maribeth,” nakuna ni Angelica. “Nasaliwanwankayo.”

“Naragsakka kadi no adda kuartam, Angelica?” inamad ni Maribeth.

“Siempre, magatangko amin a kayatko.”

“Saan a ti pirak ti pakarukodan ti kinaragsak. No maminsan, kasla sabidong ti pirak a mangrakrak iti pagtaengan,” kinuna ni Maribeth.

(Maituloyto)