Ti Nalimed a Lalaki iti Biag ni Misis Lilibeth Artates

Sarita ni Salvador A. Espejo
Maikalima a paset

Nagsubli ni Rick iti nakaiparkingan ti kotsena. Tinawaganna ni Jojo.

“Natuntonamon ti kasera ‘diay anak ni Mr. Artates?” sinaludsodna.

“Saan pay, boss. Nakakutim ti bibig dagiti kaarruba ni Mr. Artates. Dida kayat ti mairamraman.”
Nagsanultip ni Rick. Nalaka laeng koma a matuntonan ti pagkaseraan ni Andy no makikooperar ni Mr. Artates. Ngem impaganetget daytoy a ti laeng baketna ti pakaisentroan ti panagimbestiga da Rick.

“Ket daydiay modista a kaayan-ayat ni Andy, awan uray sangkadilmut la nga impormasion a maireportmo?

“Negative, boss.”

Ad-adda manen ti sanultip ni Rick. Kinudkodna ti ulona a di met nagatel.

“Agurayka, nadakamat diay assetko a mangal-ala ni Andy iti Fine Arts imbes nga abogasia kas ipappapilit ni Mr. Artates. Suyodem dagiti pagadalan nga adda kursoda a Fine Arts.”

“Wen, dayta ti asikasuek ita,” kinuna ni Jojo.

“Daytoy pay: adda kaayan-ayat idi ni Misis Artates. Romeo Alabastro ti naganna. Uray idi nagpasiudad, adda pay la komunikasionda iti lalaki.

“Nagpaiyalis ni Alabastro iti trabahona ditoy siudad. Agtrabtrabaho ita iti Metro Manila Banking Corporation. Taltallo ti sanga ti MMBC ditoy siudad. Nalaka laeng a matuntonam ni Alabastro agsipud ta adda naalami a retratona. Dumagaska ken ni Dollie ta agpaprintka iti retratona.

“Anything else, boss?”

“Dayta pay laeng. No matuntonam, tawagannak a dagus!”

Kinita ni Rick ti oras iti pungupunguanna. Pasadon alas dose. Isu met la nga agdaranudoren ti boksitna.

Nagtalangkiaw no adda panganan iti asideg ti Farmers’ Supermart. Adda karinderia iti nagkurusan.

Dimsaag ni Rick. Bimmallasiw iti kalsada. Immuneg iti Cely’s Eatery. Adda sumagmamano a mangmangan iti uneg.

Pinilina ti lamisaan a nawaya a makitana ti kotse ni Misis Artates a nakaparking iti sanguanan ti Farmers’ Supermart.

Immasideg ti waitress. Dinamagna no mangaldaw ni Rick.

Nagorder iti kape ken siopao. Madamdama, indisso ti waitress ti inorderna iti lamisaan.

Bayat ti pannangan ni Rick, pinagsasaipna dagiti impormasion a naammuanna.

Awanen duadua a nasanay ni Misis Artates a mangiyaw-awan iti asinoman a mangsurot kenkuana iti papananna.

Dua ti posible a sungbat daytoy:

Umuna, adda suspetsana a nanangdan ni lakayna iti mangsiput iti aniaman a tignayna apaman a pumanaw iti pagtaenganda agingga iti sumangpet manipud iti sadinoman a naggapuanna. Dayta ti gapuna a nagbalin a naannad ket saan a mapan iti papananna agingga iti dina kapkapnekan a a naiyaw-awanna asinoman a mangsisiim kenkuana.

Maikadua: adda tinangdanan ni Misis Artates a mangsiput iti asinoman a mangsipsiput kenkuana. No adda, sigurado nga adda nalimed a seniasda iti tinangdananna no adda mangsursurot kenkuana wenno awan.

Naapiras ni Rick ti mangrugin agtubo a barbasna. Dakkel itan ti pammatina iti maikadua. Dakkel ti suspetsana a maysa met laeng nga inbestigador ti tinangdanan ni Misis Artates a mangsigurado a nadalus ti dalan no kayatna ti mapan iti sadino man a papananna.

Nalagipna ti lalaki a nangdungpar kenkuana idi ginandatna ti aglugan tapno surotenna ni Misis Lilibeth. Isu kadi? Iti panaglanglanga daytoy ket maysa a pribado nga inbestigador.

Pagammuan, nagkiriring ti selponna. Ni Jojo.

“Natuntonakon ti pagtrabahuan ni Romeo Alabastro, bossing. Ditoy Cubao branch. Teller isuna. Ania ti next move ko?”

Tinaldiapan ni Rick ti oras iti pungupunguanna. Agalaunan.

“Agurayka dita sanguanan ti bangko. Amangan no marelibuanda. Tawagannak no rummuar, wen?”

“Speaking of the devil, rumrummuar ni Alabastro, bossing. Kasla agdardaras. Agur-uray itan iti taksi.”

“Surotem! Dimo palusposan!” imbilin ni Rick.

Nagminar ti isem iti bibig ni Rick. Saan a pumanaw ni Romeo Alabastro no saan a nasisita ti papananna. Dakkel ti suspetsana a tinawagan ni Misis Artates tapno agsarakda!

(Adda tuloyna)