Kabkabanga iti aparador ni Kagawad Alcab (Umuna a paset)

Sarita ni Mancielito S. Tacadena

 

“Apay a kaguratayo dagiti babakla nga umay ditoy barangaytayo? Saan kadi a maysa daytoy a panangilanglangi kadagiti homoseksual a kakabsattayo?” inggurruod ni Kagawad Vladimir Rommel Alcab kalpasan nga imbasak ti resolusionko iti sango ti konseho a mangipawil iti panagrampa dagiti babakla iti barangaymi a Suso iti ili a Calaoa-an.

“Para met laeng iti pagsayaatan dagiti bakla ken ti barangay daytoy, kagawad, ta adun ti mangmangegtayo nga ang-angaw manipud kadagiti sabali a barangay nga apon ti binabae toy barangaytayo. Numuna ta Suso pay ngarud met ti naganna,” diak impadlaw ti nerbiosko iti nabangag a timek ti padak a kagawad.

“A, wen nga agpayso, uray siak madlawko met ti panagadu dagiti kakasta nga um-umay ditoy barangaytayo. Masapul sa a maingetan dayta ta dinto agbalin a gay capital toy barangaytayo. Ngem ne, permi ti dagaangnan, break man pay iti kinse minutos ta pagsasanguantayo pay toy aglingling-et a coke,” kinuna ni Kapitan Mark Jeffrey Pecpec.

Ditoy barangaymi a Suso, saan a nakakaskasdaaw ti kaadda dagiti medio berde ken nabangsit ti tonona nga apiliedo. Kas iti nagan ti kakontrak a ni konsehal Alcab. No baliktadem talaga nga agkatawaka. Sabagay saan met ket a tukkol ti panagkitak a ta kasla agbagbagi a body builder sa pay la napuskol ti barbasna. Atiddog ti buokna a kasla ni Ryan Dunn iti pabuya a JackAss. Ni kapitan la ngaruden aya, limmalakkian a Pecpec ti apiliedona. Pay man ta yam-ammok fagiti padami a kagawad, da Kgd. Redentor Quiqui, Kgd. Joe Antonio Penis, Kgd. Cris Alberto Mangay-ayam, Kgd. Gregory Palaganas IV, Gloria Mariz Cabasaan ken siempre diak met ilaksid toy bagik, siak ni Kgd. Ely Marcus Semilla.

“Ala ituloytayon ti sessiontayo kakadua,” kinuna ni Kap. Mark idi mapaabbatanna ti basona. “Ania ngay ti rumbeng nga aramidentayo iti panagrairan dagiti binabai ditoy barangaytayo?”

“Kap, agsipud lta agbalinen nga ayuyang dagiti darna toy lugartayo, siempre, adu ti madi nga epektona para iti barangaytayo,” kinunak.

“Apay, ania koma ti madina? Adu ti maitultulongda ditoy. Immadu ti nagipatakder iti negosio a parlor. Saan aya a dakkel ti mapaspastrek ti barangay gapu kadagitoy? Adda payen dagiti flower shop a pakagatangan iti presko a sabsabong para iti aniaman nga okasion. Ti Organization of Gays in Metro Suso wenno ORGASM ti katahoran a benefactor no kasdiay nga agpiesta ti ilitayo,” intebbag ni Kgd. Alcab.

“Ala, mapantayon nga adda sumsumrek iti kaban gapu kadagita imbagam a negosio ngem saantayo kadi a maobserbar nga umad-adun dagiti ubbing a lallaki ditoy a tumultulad iti kinni dagiti bakla a makitkitada. No mapanuynoyanda, di pay umadun ti bakla a kalugaran? Sinonto pay ti mayat nga agtalon ket sumrekdanto met aminen iti PMA wenno Pedicure, Manicure, Agkulot?”  kinuna met ni Kgd. Palaganas a co-author ti resolusion.

“Inayonko pay, Kap, ti areng-eng dagiti inna dagiti agtutubotayo ta dagiti agparparlor, iti metten balayda nga agnaed. Agbalin metten a darling dagiti babbaritotayo. Immoral dayta,” kinuna met ni Kgd. Cabasaan, maysa kadagiti addaan anak a darling ti bakla.

“Ania koma ti ririenda ket isuda met ti aggatang iti kanenda. Kaykayatda pay a ta didan parikut ti ipakanda kadagiti annakda. Libre pati alawansda nga agbasa,” inkalintegan manen ni Kgd. Alcab.

“Ania ngad ti rumbeng a maaramid?” dinamag ti kapitan a makais-isem.

“Ala, tapno saan met a mapukaw dagiti negosio a pagpaspastrekan ti barangay, Kap, ta diak met kayat a maksayan ti honorariumko, mapalubosan lattan dagiti makinkukua iti parlor ken dagiti empleadona nga agnaed ditoy. Ngem dagiti sabali ti rantana kas kadagiti agtambay la iti parlor nga agpalabas iti mabiktimana a barito, masapul a mapawilandan nga umay ditoy babaen kadagiti barangay tanod. Mangipasdektayo iti check point ta masapul a no dumteng ti alas dies ti rabii, makapanaw aminen a bakla iti barangaytayo. Iti kasta, malapdan pay ti pannakariingtayo iti tengnga ti rabii no kasta nga agriririda maipanggep iti boyfriendda,” inlitaniak ti kayatko a mapasamak.

“Agmulta pay ti bakla nga aglaaw iti rabii ket diay maurnong a multa, isunto ti para kape dagiti agronda,” innayon ni Kgd. Mangay-ayam.

(Adda tuloyna)