Nalmes a pahinante, nabirokanen

STA. MARIA, Ilocos Sur – Bangkayen a nasarakan ti maysa a truck helper a naireport a ginuyod ti napigsa a koriente ti danum bayat ti panagdigosna iti baybay a sakup ti Barangay Suso ditoy nga ili idi aldaw ti Hulio 22.

Naipan iti maysa a puneraria ditoy nga ili ti bangkay ni Marlon C. Batinga, 36, ken residente iti Pantay Pira Street, Bagong Barrio, Caloocan City, pangur-urayan dagiti mangtunton kenkuana a kakabagianna.

Segun iti report, napan nagdigos iti Suso Beach ti biktima a mapapati a nakainom iti arak ket ginuyod nga impataaw ti napigsa a koriente.

Nagtinnulong dagiti polis ken Philippine coast guard a nakabase iti Barangay Nalvo, ditoy met laeng nga ili, a nangisayangkat iti rescue operation ket nasarakan ti bangkay ti biktima idi agarup 5:44 ti agsapa ti Hulio 23.#