Nalungsot a kamatis iti arpad dagiti presko

Ni Tatang Lakay

 

Itay nabiit, nangegmi manen a naipatangatang ti maysa a ballaag iti publiko a saanen a konektado ti maysa a kameng ti media a dati a nagpaay a broadcaster iti nasao a radio station. Idi napan a tawen, nasalamaanmi manen daytoy a ballaag iti publiko mainaig met laeng iti nasao a kameng ti media kuno. Ngamin, adda dagiti report wenno pulong a dimmanon iti daytoy nga estasion maipapan iti mapapati a panagsolisit daytoy kadagiti tattao para kadagiti nangruna a pagteng ditoy probinsia kas iti kablaaw iti panagkasangay ti maysa a politiko, dagiti nakaruar iti eleksion, paskua wenno baro a tawen a maipatangatang iti radio ken maipublikar iti pagiwarnakna nupay lumned-tumpaw daytoy.

Maipalagip la ket ngarud kadakami dagiti nakalangenlangenmi a dadduma a kameng ti media (puera de los buenos!) a nasiglat nga ag-sariling sikap.

Kas iti daytoy empleado idi iti maysa a national agency. No mapanka iti opisinada, manmano a madatngam daytoy. Adda iti “field” sangkakuna ti konsintidora a pangulona. Ngem ti pudno, adda iti langlangalang nga agsolsolisit iti anunsio para iti  pagiwarnakna. Adda ngamin iruruarna a pagiwarnak idi.  No mapasungadan dagiti politiko, “adda manen ni Mr. Solicit,” kunada. Ngem talaga a napuskol ti kudilna wenno saan a kumpet kenkuana dagiti pasagid.

Agsusueldo manipud iti gobierno, usarenna pay dagiti ramit ken suplay ti opisinada. Pati gasolina, papel, bolpen a suplay ti opisinana, aramatenna para iti bukodna. Saan laeng a padagsen ti gobierno no di pay mangibabain iti padana nga agop-opisina ken kameng ti media.

Kasta met iti maysa a gayyem “idi”. Makuna metten a nangato ti puestona. Ngem siguro, saan a mapnek iti “bassit” a matgedanna ket kasapulan a supusopanna babaen ti “sariling sikap”. Uray adda opisinana, no adda pasken wenno napudot nga isyo a pakainaigan ti maysa a nangato nga opisial wenno politiko, agtartarayen daytoy, kaduana ti maysa pay a kaburburikna, a mapan manginterbio iti dayta a tao. Sigaganas met ti opisial wenno politiko a mangted iti interbio. Ngem anian a lab-ay ti isemna kalpasanna ta adda met gayam kasukat ti pannakainterbiona: dumawat dagitoy iti para “gasolina”, malaksid nga agtig-abda iti pulotan ken inumen.

Maysa a kadaraan a balikbayan a retirado a politiko ti nakaisalpika a dina impagarup a kastoy gayam dagiti sumagmamano a kameng ti media ditoy probinsia. Idi damo, nakaragragsak daytoy retirado itan a politiko ta dinanon dagiti “gagayyemna” iti media iti balayda tapno laeng interbioenda. Ngem nasdaaw laengen ta kalpasan ti interbio, di met pumanawen dagitoy. Anta gayam, yur-urayda ti maiyarikap kadakuada. Manipud idin, saanen a painterbio daytoy iti balayda. Isun a mismo ti mapan iti estasion ti radio no adda dagiti gannuat nga ipakaammoda iti publiko.

Adda pay am-ammomi a mannurat nga ingget lastog no nalaokanen iti nasanger ti darana. No saan a makainom, kasla di makapettak iti bulong a makuna. Ngem baliktaden no addan laok a nasanger ti darana. Kayariganna ti tukak nga umarikiak iti damo a tudo. Yan ti rigatna, awanen ti ipirpiritna. Isun ti kalaingan iti lubong. Iti maysa a konbension dagiti mannurat, ti timekna ti tumtumpaw iti entablado, nupay awan ti pasetna iti programa. Kimmarit payen. Nakababain ta adda pay iti tallaong ti mayor a naawis a kangrunaan a sangaili iti dayta a rabii.

Sabali laeng ti nakalugananmi iti maysa a minibus a “maresrespeto” a kameng ti media. Dinak nakita ta addaak iti likud. Limmuganda iti minibus, kaduana ti dua a lalaki ken maysa a babai. Naariwawada ket mailasin a nakainomda.

Nakigtotak laengen idi kellaat a kinunana iti maysa a baket: “Agpaigidka man ta agtugawak dita!”

Idi singiren ti konduktor ti pletena, kinunana ketdin: “Dinak am-ammo? Taga-mediaak!”

Saanen a siningir ti konduktor, ti kameng ti media agraman dagiti kakaduana. Mabalin a nakigtot iti kinadang-as daytoy nga igges a kameng ti media.

Dimsaag dagitoy iti akintengnga a Govantes dike. Simmurot a dimsaag ti respetok kenkuana.

Sumagmamanoda laeng dagitoy a nadakamatmi ngem dagitoy a tattao ti mangdadael iti imahen dagiti agiwarwarnak ken mannurat ditoy probinsia. Isuda dagiti nalungsot a kamatis a mangramaram iti sibubukel a basket a naglaonan dagiti presko ken kappuros ken  makagapu no apay a bimmaba ti kredibilidad dagiti kameng ti media ditoy probinsia. Kasta met a daytoy ti dakkel a gapu nga awan ti panagtutunos dagiti agiwarwarnak ditoy.

Kasano a mapataud ti panagtitinnalek ken panagraem iti tunggal maysa no kastoy ti klase a tao dagiti dadduma a kakadua iti propesion?#