Nangabak a bokal, naitantan ti pannakaiproklamada

VIGAN CITY – Nataktak ti pannakaiproklama dagiti nangabak a bokal iti umuna ken maikadua a distrito ti Ilocos Sur gapu iti glitches kadagiti PCOS machines a naaramat iti panagbubutos idi Mayo 13, 2013.

Tallo nga ili a pakaibilangan ti Sinait, Magsingal, ken Sta. Maria ti saan a nakaipaw-it iti resulta ti panagbubutos gapu iti glitches dagiti PCOS machines.

Iti Sinait, tagtagiuray pay dagiti kameng ti Municipal Board of Canvassers ti CF card  manipud iti Manila tapno maiprinta ti resulta ti panagpabutos iti maysa a barangay ti nasao nga ili.

Mapapati a kastoy met la ti problema dagiti MBC iti ili ti Magsingal ken Sta. Maria.

Inkeddeng ti Board of Provincial Canvassers a dida pay iproklama dagiti nangabak a bokal agsipud ta apektaran pay ti rankingda ti resulta ti panagbubutos kadagiti tallo nga ili.#