Footer

Nangatngato a bayadan iti basura, buis iti Baguio City, naisingasing tapno mapunduan 2009 budget

BAGUIO CITY – Saganaan dagiti residente ditoy ti dakdakkel a pagbayadda iti pannakakolekta iti basura, market fees, serbisio ken nangatngato a buis iti real properties tapno mapunduan ti budget para iti 2009.

Kinuna ni Mayor Reinaldo Bautista Jr., nga isingasingna ti pannakaingato ti garbage fees iti P500 kada pagtaengan ken P1,200 kada pasdek negosio manipud iti P50 kada pagtaengan ken P100 kada commercial buildings tapno mapaadda ti pundo para iti pannakamanehar ti basura.

Ti pannakakolekta ti basura ken pannakaibiahe daytoy iti Capas, Tarlac ti maysa a dakkel a paggastosan ti gobierno ditoy.

Agingga ita, awan pay ti permanente a pagbasuraan ti siudad kalpasan ti pannakaserra ti pagbasuraanna iti Irisan kalpasan ti panagprotesta dagiti agindeg ditoy ken iti aglawlawna a barangay.

Kinuna ni Bautista a kasapulanen a maipangato ti bayad iti basura agsipud ta idi pay la 1992 ti kaudian a pannakaipangatona.

Iti daytoy a tawen, inaprobaran ti konseho ditoy ti espesial nga alokasion nga agdagup iti nasurok P103 milion a pakairamanan iti P60.5 miliion para iti pannakakolekta iti basura agingga iti agtapus daytoy a bulan, P30 million para iti pannakagatang iti lugar nga agbalin a permanente a pagibasuraan ken P12.6 million para iti pannakagatang kadagiti drump truck a maaramat iti pannakakolekta dagiti basura.

Kinuna ti mayor a kasapulan pay ti reporma iti buis tapno mapunduan dagiti nangruna a proyekto ti siudad kas naipalaon iti naisingasing a budget a P950,140,000 para iti 2009.

Agdagup iti P50 milion ti dimmakkelan ti budget no maikumpara iti budget para iti 2008.

Ngem kinuna ti mayor a naisentro ti naisingasing a budget kadagiti programana a mangidur-as kadagiti prioridad a pakaseknan ti siudad kas iti rehabilitasion ti Baguio Convention Center, pannakapasayaat ti tiendaan ti siudad ken iti pannakaited iti subsidy para iti operasion ti Burnham Park a pakabusbosan iti agdagup P59 milion.#