Nangdangran kadagiti dolphin, sumango iti pannakabalud

DAGUPAN CITY – Sumango iti pannakabalud dagiti matiliw a nangdangran kadagiti dolphin iti kabaybayan ti Pangasinan, daytoy ti imballaag ti maysa nga opisial ti Bureau of Fisheries and Aquatic Resources.

Segun ken ni Dr. Westly Rosario, interim executive director of the National Integrated and Fisheries Development Center (NIFTDC) ti BFAR, mabalin a makalapped dagiti dolphin iti panagkalap dagiti commercial fishermen isu a nagayangda kas ipakita dagiti dadakkel a sugat dagitoy naisalakanda nga endangered species.

Naammuan nga addan 17 a naisadsad a nasugatan a dolphin iti La Union ken Pangasinan, ket uppaten ti natay a pakairamanan ti maysa a natay iti ili ti Sual itay laeng nabiit.

Iparit ti linteg ti panagkalap kadagiti endangered species ket maibalud ti aglabsing iti manipud 12 agingga iti 20 a tawen wenno mamulta iti P120,000 ken pannakasamsam iti nakalapan ken pannakakansela iti permiso nga agkalap.#