Nanggudas 3 a tao iti food court, awan pay suspek

NARVACAN, Ilocos Sur – Nupay adda dagiti nakasaksi iti pannakapapatay dagiti tallo a tattao iti panganan iti tiendaan publiko ditoy idi rabii ti Abril 24, awan pay maitudo a suspek iti nasao a krimen.

Daytoy iti baet dagiti follow-up investigations nga insayangkat ti Ilocos Sur Provincial Police Office nga indauluan ni Supt. Feliciano Gubatan, DPDO ken ti Narvacan police station nga indauluan ni Chief Inspector Rex B. Buyucan, COP.

Segun iti kapolisan, nupay sibibiag pay ni Albino Floria idi intaray ti anakna a ni Allen Floria iti Saint James Hospital, awan ti nadakdakamatna a nagan a mangpatay kenkuana.

Mangmangan da Albino Floria y Pacubas, 50; Deo Taiza y Javier, 33; ken Dionisio Rabang y Rabbon, 53, iti food court iti tiendaan publiko ti Narvacan idi kellaat a nagparang ti maysa a suspek sana pinaltopaltogan dagiti biktima iti sumagmamano a daras a nagsagrapan dagitoy iti sugat iti nadumaduma a paset ti bagida.

Naideklara ni Taiza a dead on arrival iti Central School District Hospital a nakaitarayanna, idinto a pimmusay da Floria ken Rabbon bayat ti pannakatamingda iti Saint James Hospital, Vigan City ken Metro Vigan Cooperative Hospital, Bantay, Ilocos Sur.

Nakasarak dagiti inbestigador iti crime scene ti 3 a kapsula ti di ammo ti kalibrena a paltog, 3 a buli, maysa a deformed slug, maysa hi-cap magazine nga addaan iti 13 a bala para cal. 45, maysa a pakete ti Malboro lift-top nga addaan iti 7 nga stick ti sigarilio, ken maysa a transparent plastic sachet a naglaon iti mapapati a shabu.

Ngem limtuad bayat ti naun-uneg a panagimbestiga dagiti polis a nakasuan ni Floria iti murder idi Oktubre 28 ngem naareglo ti kasona.

Kasta met a nakasuan ni Floria iti murder mainaig iti pannakapapatay ni Nalvo Barangay Captain Melchor Alcantara y Sembrano, 51, idi Marso 28.

Agdaldaliasat ti Adventure a lugan ni Alcantara iti national highway a sakup ti Barangay San Antonio, Narvacan idi agarup 8:40 ti rabii ti nadakamat a petsa idi inabay ti motorsiklo a nagluganan dagiti suspek ket maysa kadakuada ti nangpaltog iti sumagmamano a daras iti biktima.

Ni Floria ti maitudtudo a nagmaneho iti motorsiklo a naaramat iti pammapatay.

Kabayatanna, ni Taiza ti masuspetsa a John Doe a kadua ni Floria idi naidarum iti murder gapu iti pannakapapatay ni Alcantara.

Iti met palawag ni Eufrosina Rabang y Cacabelos, kinunana nga awan ti kabusor ti lakayna a ni Dionisio, maysa a chief tanod iti Barangay Quinarayan ken miembro iti AFP reservist enlisted personnel.
Kinunana nga adda ti asawana iti lugar a nakapasamakan ti krimen agsipud ta guardia daytoy iti food court.

Segun ken ni Eufrocina, masansan nga ibagbagada ken ni Dionisio Rabang a saan nga makikuykuyog ken ni Floria gapu kadagiti alegasion a pannakainbolbarna iti illegal nga aktibidad ngem saan a nangitaltalek daytoy.

Mapapati nga adda ikut ni Rabang a Colt .45 iti dayta a rabii ngem iti report dagiti inbestigador, awan ti nasarakan a kasta a paltog iti crime scene.

Kasta met a kinuna ti maysa a tanod a nakitana ni Allen Floria a nangala iti paltog ti amana idi itaray daytoy ti dakkelna iti ospital.

Ngem pinaglibakan ni Allen Floria nga innalana ti paltog ti amana.#