Nanggudas iti barangay kagawad, nabigbigen

VIGAN CITY – Nabigbigen ti nanggudas iti kagawad iti maysa a natayan iti Barangay Capangpangan ditoy siudad idi agarup 1:45  a.m. ti Marso 3.

Nainaganan ti suspek a ni Jessie Peralta y Torio, baro, tricycle driver ken residente met laeng iti nadakamat a barangay ket naipilaanen iti kaso a murder iti City Prosecutor’s Office gapu iti panangpapatayna ken ni Rogelio Palce y Artates, 55, naasawaan, barangay kagawad.

Maipalagip a madama a makidaddado ni Palce iti maysa a natayan idi kellaat nga immasideg ti suspek sana pinaltogan iti naminsan ti biktima a nagsagrapanna iti sugat iti ulona.

Indeklara ni Dr. Carmelo Papa, medico-legal officer III, ti biktima a dead on the spot.

Nakasarak ti SOCO team iti maysa a kapsula manipud iti cal. 45 iti nakapasamakan ti krimen.

Iti pannakaisurat daytoy, birbiroken pay laeng dagiti polis ni Peralta ken di pay ammo ti motibo ti nanggudasanna ken ni Palce.#