Footer

Nangpaltog iti mayor ti Marcos, di pay nabigbig

LAOAG CITY – Awan pay ti suspek dagiti polis a nangpaltog ken ni Marcos Mayor Salvador Pillos idi malem ti Pebrero 4.

Kasta met a berberipikaren pay dagiti polis no asino ti pudno nga akinkukua iti getaway a motorsiklo nga inaramat dagiti suspek kalpasan ti panangpaltogda ken ni Pillos.

Segun  iti polis, agtultuloy ti panagimbestigada tapno matuntonan ti pudpudno nga akinkukua iti getaway a motorsiklo nga imbati dagiti suspek iti kabambantayan a paset ti Barangay Lydia, Marcos bayat ti panaglibasda.

Pinaltogan dagiti armado a tattao a riding in tandem ni Pillos iti sanguanan ti Marcos National High School idi pasado alas kuatro ti malem ti nasao a petsa a nagsagrapanna kadagiti sugat iti takiag ken luppona.

Mamati ti mayor a politika ti motibo ti pannakagandat ti biagna.

Nupay kasta, awan ti dinakamat ti mayor nga adda iti likudan ti pannakapaltogna.#