Nangpapatay iti court aide, di pay nabigbig

STO. DOMINGO, Ilocos Sur – Awan pay ti suspetsa dagiti polis iti pannakapapatay ti maysa a court aide iti sanguanan ti maysa a tienda iti barangay Puerta Real idi bigat ti Oktubre 21.

Kasta met a kitkitaenda no adda pakainaiganna iti trabahona ti pannakapapatay ni Lormin Pascua y Ariganio, 39, court aide iti Municipal Circuit Trial Court iti Caoayan, Ilocos Sur, ken agdama nga agnaed iti Barangay Ayusan Norte, Vigan City.

Nupay kasta, kinuna ti polis ditoy nga ili a naidatagen iti provincial crime laboratory ti kapsula a narekobreda iti nakapasamakan ti pammaltog.

Napaltogan ni Pascua idi agarup 9:15 ti bigat iti sanguanan ti Peros Tinobong and Delicacies Store babaen dagiti dua a tao a naglugan iti motorsiklo.

Iti panagimbestiga dagiti polis, naammuan nga imparking ni Pascua ti motorsiklona a Motorstar 110 a naglugananda ken ti asawana a ni Sheryl Pascua y Corpuz, 27, iti dayaen nga abaga ti kalsada a sakup ti Barangay Puerta Real, ditoy nga ili tapno mapan gumatang ti baketna iti delicacies iti nasao a tienda.

Kabayatan ti igagatang ni Sheryl, inasitgan dagiti suspek ti biktima a nakatakder iti abay ti motorsiklona ket pinaltoganda ti ulona.

Naitaray ti biktima iti Metro Vigan Cooperative Hospital ngem pimmusay bayat ti pannakataming ti sugatna.

Naglibas dagiti suspek a nagturong iti amianan a direksion.

Nangiwayat dagiti polis iti manhunt operation ngem saandan a nakamakam dagiti suspek.#