CAMP B/GEN. OSCAR M. FLORENDO, SAN FERNANDO CITY – Imbilin ti PNP regional director ditoy ti madagdagus a pannakaipila ti kaso maikontra iti pimmatay iti maysa a pamilia iti Sitio Saway, Manalpac, Solsona, Ilocos Norte.
Segun iti polis, ni Valdez Lagisag Bago, 49, naasawaan, residente iti Barangay Maan-anteng ti kangrunaan a suspetsa iti pannakapapatay da Quezon Mata, 59, naasawaan, ti anakna a Rene Mata, 12; ken Jojet Balaybay, 17.
Nagsagrap ni Jessie Mata, 16, iti dunor iti makannigid nga imana idinto a saan a naan-ano ni Dondon Pagmaat, 5.
Segun iti report, aglutluto dagiti biktima iti pangngaldawda iti kuboda idi immasideg ti suspetsa ket awan gapgapuna a pinaputokanna ida.
Nakarekobre dagiti polis iti 3 a kapsula manipud iti gauge 12 shotgun iti nakapasamakan ti pammapatay.
Simmuko ti suspetsa iti polis ngem awan nga insukona nga armas. (Danny Antalan)