Footer

Nangrugin dagiti panagmaniobra

ITI napasamak a pannakapili ti presidente ti Senado ti mangpaneknek nga iti politika awan ti permanente a gayyem wenno kabusor ket magna ti maniobra ken nalimed a tulagan tapno magun-od ti bukod a panggep wenno interes.

Nailayon ni Manuel Villar a Senate President, maikatlo a kangatuan a puesto iti gobierno iti baet nga ad-adu ti bilang ti oposision iti panangabak ti pito a kandidatona iti napalabas nga eleksion.

Sangapulo ket dua ti bilang dagiti kameng ti oposision. Mairaman ditoy da Sen. Rodolfo Biazon, Jamby Madrigal, Manuel Roxas II, Aquilino Pimentel Jr., Jinggoy Estrada, ken dagiti kabutbutos a senador iti babaen ti Genuine Opposition a pakaibilangan da Sen. Loren Legarda, Panfilo Lacson, Francis “Chiz” Escudero, Allan Peter Cayetano, Benigno Aquino III, Antonio Trillanes ken Manuel Villar.

Iti sabali a bangir, siam laeng dagiti administrasion senators a pakaibilangan da Sen. Pia Cayetano, Miriam Defensor-Santiago, Juan Ponce Enrile, Richard Gordon, Lito Lapid, Ramon “Bong” Revilla, ken dagiti kabarbaro a nabutosan kas kada Sen. Edgardo Angara, Joker Arroyo ken Juan Miguel Zubiri.

Tapno agmayoria ti oposision, kasapulanna laeng ti dua a butos. Posible a maalana daytoy dua a butos kadagiti independiente: da Sen. Gregorio “Gringo” Honasan ken ni Francis “Kiko” Pangilinan wenno dua wenno tallo laeng a butos manipud kadagiti adda iti administrasion a senador.

Ngem ania ti napasamak?

Nakitulag ni Villar kadagiti administration senators. Babaen ti suporta dagiti walo a senador ti administrasion, ni Honasan ken (sorpresa!) dagiti tallo a kameng ti oposision a pakaibilangan da Estrada, Alan Peter Cayetano ken Escudero, nakaukkon ni Villar iti 14 a butos a nangipangabak kenkuana a Senate President.

Iti daytoy a napasamak, amusayanen ti oposision ti subsobna ta nagbalinda laengen a minority bloc iti Senado ket sigurado a maited dagiti chairmanship kadagiti kangrunaan a komite iti majority block ni Villar a timmiponan dagiti administration senators.

Kaarig ti oposision dagiti mannakigubat a nangabak iti dangadang (iti eleksion) ngem idi pagbibingayandan ti bunga ti balligida, dagiti metten inabakda ti nagunggonaan.

Makaulaw? Ngem kasta ti politika iti pagilian.

Ita, ukarkarentayo ti napalabas.

Saanen a nasken nga ipalagip a ni Villar ti House Speaker idi minaysaanna dagiti kabaddungalanna babaen ti napardas a panangipatulodna iti impeachment complaint maikontra ken ni dati a Presidente Joseph Estrada.

Nagtunged ti impeachment hearing iti pannakapadisi ni Estrada iti puestona kalpasan ti panagprotesta dagiti tattao iti Edsa gapu iti saan a panangipalubos dagiti senador a kadua ni Estrada ti pannakalukat ti maikadua nga enbelop a mapapati a naglaon kadagiti dokumento a mangpatalged a ni Estrada ti akinkukua iti bank account a nainagan ken ni Jose Velarde.

No apay a nairaman ni Villar iti tiket ti oposision ti narigat a maawatan iti baet ti pasetna iti panagdur-as ti impeachment complaint kontra ken ni Estrada  tangtangaden ti oposision a panulida.

Ita, namnamaen dagiti administration senators ti “status quo” kadagiti idauluanda a komite.

Posible a daytoy ti nalimed a tulagan iti nagbabaetanda ken ni Villar.

Kangrunaan a masipsiputan no sino ti pakaitedan ti nabileg a blue ribbon committee. Ni Joker Arroyo ti chair daytoy a komite ngem dakkel a nakababalawanna iti kallabes agsipud iti saan a naan-anay a pannakaimbestiga ti mapapati a bank account ni Jose Pidal, ti agriculture scam a nakaikampitan ni Jocjoc Bolante, ken dadduma pay a kaso a nakainbolbaran dagiti nangato nga opisial ti turay.

Ngem segun kada Estrada, Cayetano ken Escudero, adda tulaganda sakbayna a maited ti chairmanship iti nasao a komite iti maysa a kameng ti oposision ket imballaag pay ni Estrada nga ibabawina ti suportana ken ni Villar no agtuloy latta a ni Arroyo ti mangipangulo iti blue ribbon committee.

Ngem uray ni Estrada ket nagunggonaanen iti panangsuportana ken ni Villar.

Isu ti napili a Senate President Pro Tempore, maikadua a kangatuan a puesto iti Senado.

Ni met Senador Kiko Pangilinan, kas gunggonana, agtuloy iti puestona a Senate Majority leader. Madakamat ditoy a miembro ni Pangilinan iti Wednesday Group a pakaibilangan ni Villar, Arroyo ken ni Vice Pres. Noli de Castro. Ni Recto a maikapat a kameng ngem nanabtuog iti panagpailayonna a senador.

Idi pay laeng madama ti kampania, saan a naigawid da Villar, Arroyo ken Pangilinan a nangindorsar iti kandidatura ti tunggal maysa iti baet a naikappengda iti agsupanget a partido.

Manamnama ngarud nga agtitipkel dagitoy kadagiti isyo ken pagtakderan .

Ti napasamak iti Senado ket pakpakaunan ti eleksion inton 2010. Nagnan dagiti panagmaniobra ken addang tapno maiduron dagiti nalimed a panggep, plano ken interes.

Kas nasaomin, iti politika, ti gayyemmo ita, isu ti mangliput ken mangibaba kenka no makitana a sika ti balanganna a pumangal nga agpangato.#