Footer

Napag-aanamongan dagiti traders, mannalon: P10 maituon iti presio ti Grade AA a tabako

QUEZON CITY –  Kalpasan ti namindua a pannakaitantan ti pannakaiyetnag ti presio ti tabako iti masungad a tobacco season, napagnunummuan iti tobacco tripartite consultative conference a manayonan iti P10 ti presio ti Grade AA a tabako idinto a P9.50 kadagiti nababbaba a grado.

Napagnunummuan dagiti mannalon, traders ken manufacturers, ken ti National Tobacco Administration bayat iti nasao a kumperensia a naangay iti opisina ti NTA ditoy itay Disiembre 10 a masurot dagiti sumaganad a presio iti masungad a  tobacco season: : Grade AA –  P61.00,  A –  P59.00, B – P57.00, C – P55.00, D – P50.00, E – P49.00, F1 – P43.00, F2 – P42.00, ken reject  – P23.00.

Idi  2005-2006, dagiti sumaganad ti naituding a  floor price ti tabako :  Grade AA- P51,  A – 49.50,  B – 47.50, C – 45.50; D – 40.50; E – 39.50;  F1 – 35.50;  F2 – 32.50 ken  reject – 13.50.

Kinuna ni Gov. Deogracias Victor “DV” Savellano  a  daytoy ti kaunaan a gundaway a naikkan importansia ti kiddaw dagiti agmulmula iti tabako ket dakkel metten a banag ti nainayon a presio ti tabako tapno saanda nga agpukaw iti panagmulada iti daytoy kangrunaan a produkto iti probinsia ti Ilocos Sur.

“Namnamaenmi a maay-ayo  dagiti mannalon  nga agmula iti tabako iti daytoy a tawen.  Bumasbassiten ti agmulmula ti tabako ta dida kapkapnekan ti ganansiaenda,”kinuna met ni Cong. Eric Singson.

Iti tripartite meeting a naangay idi Nobiembre 12, sangsangkamaysa nga indatag dagiti gunglo dagiti mannalon manipud iti Ilocos Sur, Ilocos Norte, La Union ken Pangasinan babaen ti panangidaulo da Gov. Savellano ken Dip. Eric Singsona maingato ti presio ti Grade AA a tabako iti P71.96 kada kilo ngem nagkiddaw dagiti traders iti tiempo a mangadal iti nasao a proposal.

Sakbayna, saan a nagballigi ti umuna a a naangay a tripartite meeting agsipud ta P5 laeng ti kayat dagiti trader ken manufacturer a ngumatuan ti presio ti tabako.

“Saanda laengen nga agmula iti tabako ta saanda met a kumita iti daytoy a presio,”  kinuna ni Singson.

Simmaruno a naisingasing a P9 agingga a nagsinnabat dagiti mannalon ken traders iti P10 a ngumatuan ti presio ti tabako.

Idi Oktubre 16, inangay ti provincial government babaen ti initiatibo ni Savellano ti tobacco summit no sadino nga indatag dagiti mannalon dagiti problemada kangrunaan ti kinababa ti presio ti produktoda a tabako iti baet ti dumakdakkel a mabusbosda iti inputs.

Alegasion pay dagiti agmulmula ti tabako ti mapaliiwda a nakurang a panangisakit ti NTA kadakuada.

Iti panagbisita ni Savellano iti Hunan, China, naduktalanna a P200 kada kilo ti presio ti Grade A a tabako ken P100 kada kilo ti reject idinto nga itay napan a tawen, P55 laeng kada kilo ti kangatuan a panaggatang dagiti traders iti Grade A a tabako.

Uray ni Cong. Eric Singson, kinumpirmana a P200 kada kilo ti panaggatang dagiti traders iti Grade A a tabako.

Iti immun-una nga interbiona, inyunay-unay ni Savellano a kasapulan ti pannakapapigsa ti industria ti tabako agsipud ta daytoy ti maysa kadagiti kadakkelan a pangalaan ti probinsia iti pundo para kadagiti nadumaduma a proyektona.

Aggapu iti Ilocos Sur ti 70% a produksion iti tabako iti rehion a pakaibilangan ti Ilocos Norte, La Union ken Pangasinan ket daytoy a probinsia ti kadakkelan iti bingay iti excise tax ti tabako kas intuding ti R. A. 7171.#