Napag-aanamongan tripartite conference: P3/kilo maituon floor price ti tabako

VIGAN CITY – Manayonan iti tallo a pisos ti floor price ti tabako para iti sumaganad a dua a tawen, daytoy ti napag-aanamongan iti tripartite conference a naangay iti Quezon City itay nabiit.

Kanaig daytoy, manipud iti P78.00, agbalinen nga P81.00 kada kilo ti floor price ti Class Double A a tabako; ti Class A, agbalinen a P79.00; Class B – P77.00; Class C – P75.00; Class D – P69.00; Class E – P66.00; FI – P59.00; F2 – P56.00; ken ti reject – P46.00.

Ngem impeksa ti maysa a barangay captain ti panagpangaduana iti pannakasurot ti kabarbaro a floor price ti tabako iti sumaganad a dua a tawen.

“Bareng no agpayso a masurot no madanonan,” kinuna ni Barangay Captain Cirilo Orayani idinto a linagidawna a saan a nasursurot ti naanamongan a floor price ti produktoda a tabako iti napalabas a tobacco season.

Iti interbio ni Orayani a naipatangatang iti DWRS, kinunana nga iti napalabas a tobacco season, dida pay nakarugi nga agapit, imbagan dagiti traders a bimmaban ti presio ti produkto a tabako.

Impalgak ti barangay captain nga adu a kalugaranna ti naglako kadagiti koboy a nagpasiar a naggatang iti tabako iti lugarda.

“Kaykayatmi payen ti aglako kadagiti koboy ta saankamin a mapan agur-uray idiay Cabugao,” kinuna ni Orayani.

Sabali pay a linagidaw dagiti mannalon iti napalabas a panagtatabako ti saan a pannakasurot iti grado ti produktoda.

Adda dagiti mannalon a nagreklamo a ti tabakoda nga ibilangda a Class Double A ti gradona ngem no naipanen iti trading center ket nagraduan metten iti nababbaba a klase, kas iti Class A wenno Class B.

Tunggal dua a tawen a maangay ti tripartite conference no sadino nga agmimiting dagiti grupo dagiti mannalon, traders ken agparpartuat babaen ti pannarabay ti National Tobacco Administration tapno matinong ti floor price a masurot iti panaggatangan iti naluto a bulong ti tabako iti dua a tawen.

Idi naangay iti Candon City ti pre-tripartite conference, kiniddaw ti sangguniang panlalawigan babaen iti maysa a resolusion ti pannakaangay ti kumperensia iti Ilocos Sur, kas kadakkelan iti produksion ti tabako iti pagilian.

Ngem saan a pinatgan ni NTA Administrator Edgardo S. Zaragoza ti kiddaw ti sangguniang panlalawigan.

Kinuna ni Zaragoza a naladawen ti pannakabaliw ti iskediul agsipud ta naitudingen ti petsa ken venue a pakaangayan ti tripartite conference ket napakaammuanen dagiti mannalon iti Mindanao, Occidental Mindoro, Cagayan ken Isabela makabulan sak-bayna.

Inkalintegan pay ni Zaragoza a nakabase ti private sectors’ representatives iti Metro Manila ket nasaysayaat a maangay ti tripartite conference iti Quezon City gapu ta hectic ti iskediulda.#