Footer

Napanawan a selpon, tablet, kinurimes ti mannanakaw

VIGAN CITY – Iti baet ti masansan a panangipalagip ti kapolisan, adda latta dagiti umili nga agibati iti alikamenda sada panawan. Kas resulta, itay nabiit dua manen a panagtakaw ti naireport sadiay Candon City ken ditoy a siudad a nakabiktimaan ti maysa a negosiante ken maysa nga agtawen iti innem nga ubing.

Idi agarup 8:10 ti bigat ti Septiembre 30, inreport ni Madelene Apili y Firme, 32, naasawaan, empleado iti Regional Trial Court Branch 20, Vigan City iti polis a napukaw ti Star Mobile phone ken Samsung Tab 3 ti kaanakanna a ni Angel Ela Monych Sanchez, 6.

Segun iti biktima, inkabilna ti phone ken tabna iti lavatory iti asideg ti nakalukat a ridaw iti likud sana pinanawan.

Naduktalan laengen nga awan dagitoy idi agarup 9:00 ti rabii ti Septiembre 29.

Agtultuloy ti panagimbestiga ti polis mainaig iti panagpukaw ti phone ken tab a
mapapati a sinikuat ti di pay nabigbig a mannanakaw.

Kabayatanna, agingga ita a masursurat daytoy, awan pay ti natiliw a suspek iti pannakatakaw ti bag ni Camilo Gamer y Galdones, 63, naasawaan, akinkukua iti Marivic Store a masarakan iti Candon Farmer’s Wet Market, Barangay San Isidro.

Idi agarup 2:50 iti malem tin Septiembre 26, Inreport ni Gamer a mapukpukaw ti bagna a naglaon iti passbook, ATM card, tultulbek, sumagmamano nga IDs, ken di ammo ti dagupna a kuarta.

Kinuna ni Gamer nga inkabilna ti bagna iti sirok ti lamisaan iti uneg ti tiendana sana inasikaso dagiti kustomerna a pakairamanan ti grupo dagiti babbai a nagpammarang nga adda gatangenda ngem dagusda met la a pimmanaw.

Idi awanen dagiti babbai, kinita ni Gamer ti bag iti nangikabilanna ngem awanen.

Dagus nga impakaammo ni Gamer iti banko dagiti natakaw nga ATM cards sana inreport ti insidente iti polis.

Iti panangrebio dagiti inbestigador iti footages a nairekord ti CCTV manipud iti opisina ti CEEDMO, innala dagiti di pay nabigbig a suspek ti bag ni Gamer, sada inarkila ti traysikel ti maysa a Clemente Naungayan, Jr., taga-Barangay Darapidap, Candon City a napan iti McDo.

Nangiwayat ti kapolisan iti hot pursuit operation ngem negatibo ti resultana.#