Napapatay gapu iti susik iti padanum

BURGOS, Ilocos Sur – Padanum ti mapapati a ramut ti pammaltog a nakatayan ti maysa a mannalon ditoy nga ili idi malem ti Oktubre 14.

Naideklara a natayen ni Andres Gabaldon y Ponsoy, 49, mannalon, residente iti Barangay Luna, Burgos, Ilocos Sur idi maidanon iti maysa nga ospital sadiay Santa Maria gapu iti linak-amna a sugat gapu iti pannakapaltogna.

Nabigbig ti pimmatay kenkuana a ni Jose Borje y Delos Santos, 46, naasawaan, ken kalugaran ti biktima.

Iti panagimbestiga dagiti polis, sakbay ti pammaltog, nakalugan iti motorsiklo ni Gabaldon ken ni Andres Alisdan, 39, mannalon, ken kalugaran ti biktima, ngem nagiddep ti makina idi addadan iti nakapasamakan ti pammaltog.

Kellaat a napasarangan dagiti dua iti lawag ti flashlight ket inawis ni Alisdan ti lalaki a naammuan idi agangay a ni Borje a makikalugan kadakuada.

Mapapati nga insungbat ketdi ni Borje: “Siak ti nangingato diay goma idiay.” Idi sinaludsod ni Gabaldon no apay, insungbat ni Borje: “Wen, a ta sarsariliem met la ti agdandanumen.”

Nagtuloy ti argumento dagiti dua ket imbaga ni Alisdan iti biktima nga aggawiddan idinto a kinunana ken ni Borje nga agsardengen.

Ngem mapapati nga immasideg latta ti suspek sana pinaltogan ni Gabaldon iti namindua sa naglibas iti saan nga ammo a direksion, kuyogna ti paltogna.

Intaray da Alisdan ken maysa nga agindeg ni Gabaldon iti Judge Celestino Memorial Hospital, Sta. Maria ngem naideklara daytoy a dead on arrival.

Nakarekobre dagiti inbestigador iti maysa nga slug iti saan pay nga ammo ti kalibre a paltog iti crime scene.

Mapapati a dati a susik ti motibo ti pammapatay.#