Naparut a marihuana, napuoran

BANTAY, Ilocos Sur – Pinuoran ti PNP, PDEA, Napolcom, ken gobierno probinsial dagiti bungkos ti marihuana a nasamsam dagiti police operatives ti Operation Raindrops 2010 iti Sitio Nagawa, Barangay Caoayan, Sugpon, Ilocos Sur iti simple a seremonia a naangay iti provincial headquarters ditoy idi Disiembre 3.

Segun ken ni PS/Supt. Eduardo Dopale, provincial director ti Ilocos Sur, 40,000 a kapuon ti fully grown a marihuana ken 20,000 a kapuon ti bunubon daytoy maiparparit a mula ti kadagupan ti nasamsam iti maikatlon nga operasion ti Operation Rain-drops 2010 a naisayangkat iti nasao a lugar ita a tawen.

Mapattapatta nga agpateg iti P106 milion dagiti naparut a mula a marihuana.

Sinaludaran ni Gov. Luis “Chavit” Singson ti agtultuloy a kampania ti kapulisan kontra ti panagraira ti maiparit a droga iti probinsia.

“Napintas ti resulta dagiti isaysayangkatyo a pannakadadael ti plantasion ti mari-huana. Masapul laeng ti naing-inget pay a panaggaraw ta kas madlaw, maulit-ulit laeng ti panagparut kadagiti nadakamat a lugar gapu ta kalpasan ti sumagmamano a bulan, adda man met laengen mulada,” kinuna ti gobernador.

Kabayatanna, ginundawayan metten ni outgoing PNP Regional Director Orlando Mabutas ti nagpakada bayat ti panagsaritana itoy nga okasion. Pinagyamananna dagiti polis a timmulong kenkuana bayat ti lima a bulan a panagserbina kas regional director iti Rehion Uno.

“No aniaman ti naaramidak bayat ti kaaddak ditoy, gapu dayta iti napagtitipon a puersa ti amin a kapolisan ken ti aktibo a pannakipaset dagiti umili ken dagiti LGUs,” kinuna ni Mabutas nga agretiron itoy a bulan.

Nairaman met a nainagunaran itoy nga aldaw ti napabaro nga administration building ti Ilocos Sur police provincial office, Makatarungan multipurpose hall ken ti nakongkreto a dalan iti kampo nga agatiddog iti 75 a metro.

Karaman kadagiti dimmar-ay iti okasion da Vice Gov. Deogracias Victor Savellano, Napolcom Director Joseph Mark Gil, representante ti Philippine Army ken dagiti kameng ti PNP regional directorial staff.#