Napasnek a pannakikaysa ti PPCRV – Ilocos Sur iti eleksion, awis ti Comelec

MOCK ELECTION. Atty. Marino Salas (in white shirt), Ilocos Sur Provincial Election Officer of the Commission on Elections witnesses the mock election and testing of vote counting machine for the Parish Pastoral Council for Responsible Voting (PPCRV) poll volunteers. Over 200 PPCRV volunteers took part in the training held at Aula de Caridad, Vigan City, Ilocos Sur on Mar. 23, 2019. The training was was also attended by Rev. Fr. Danilo Martinez, Archdiocesan Director of Social Action Commission. (photo by Eden A. Alviar)

VIGAN CITY — Napasnek a pannakikaysa dagiti poll volunteers ti Parish Pastoral Council for Responsible Voting (PPCRV) iti Ilocos Sur para iti pannakaangay ti eleksion inton Mayo 13, 2019, tapno magun-od ti Honest, Orderly and Peaceful Election.

Dayta ti kangrunaan nga inyawis ni Atty. Marino Salas, baro a Provincial Election Officer ti Commission on Elections iti Ilocos Sur kabayatan ti panangipaayna iti lecture iti Electoral Board and Vote Counting Machine Operations Training para kadagiti PPCRV Poll volunteers iti Ilocos Sur.

Naangay ti training dagiti PPCRV poll volunteers sadiay Aula de Caridad, iti daytoy a siudad idi Marso 23, 2019.

Kinadua ni Rev. Fr. Danilo Martinez, Archdiocesan Director ti Social Action Commission ken PPCRV Ilocos Sur Chairman, dagiti nasurok a 200 a kameng ti PPCRV manipud kadagiti 41 a parokia ti Nueva Segovia iti 32 nga ili ken dua siudad iti Ilocos Sur iti panagsanayda kas panagsagsagana iti masungad nga eleksion.

Iti panagsarita ni Atty. Salas, binigbigna ti naindaklan nga akem ti PPCRV kas accredited citizen’s arm ti Comelec para iti pannakaangay ti napudno, naurnos ken nakappia nga eleksion tapno maitandudo dagiti kandidato a butosan dagiti kaaduan nga umili.

“Ti PPCRV ti kangrunaan a citizen’s watchdog a binigbig ti Comelec ta daytoy a grupo ti Simbaan ti addaan iti naan-anay a kameng a naiwaras kadagiti nagduduma a paset ti pagilian,” kinuna ni Atty. Salas iti panangawisna kadagiti PPCRV volunteers a makikaysada iti Comelec ken kadagiti maseknan nga ahensia ti gobierno iti masungad nga eleksion.

Inlawlawag ni Atty. Salas a kalaksidan ti PPCRV ket adda pay dagiti grupo a tumultulong met nga agbantay iti eleksion kas ti Legal Network for Truthful Election (LENTE) ken National Movement for Free Election (NAMFREL) ngem ti PPCRV ti kaaduan ti volunteers a nagserserbin kadagiti naglabas nga eleksion.

Inlawlawag ni Atty. Salas dagiti kangrunaan nga akem dagiti PPCRV poll volunteers iti eleksion kas ti panangipaay ti voter’s education tapno mapakaammuan ken maadalan dagiti botante kadagiti kangrunaan nga isyu a pakaseknan ti pagilian, ken dagiti pagbasaranda iti panangpilida kadagiti butosanda a kandidato.

Impalagip pay ni Atty. Salas a dagiti PPCRV volunteers ket addaan iti napateg nga akem iti inspeksion dagiti voting machines, listaan dagiti botante ken dagiti balota. Impaganetgetna a maikkanda iti espasio kadagiti voting precints no nailet dagiti pagbutosan, ken maikkanda iti prioridad kadagiti lugan a kumuyog iti pannakabunag dagiti balota ken dadduma pay nga election returns.

Impakaammona a madama metten ti panagsanay dagiti mangisursuro ti Department of Education nga agpaay a kameng ti Electoral Board iti maysa a hotel iti Vigan kangrunaanna iti panagusar ti vote counting machine ta immadun dagiti safety features ti makina no maikompara kadagiti naglabas nga eleksion manipud idi 2010 a nayusuat ti poll automation. Impasingked ti Provincial Election Officer a natalged ken patas ti panagbasa dagiti VCM ta adda payen resibo a mabasa ti botante kalpasan ti panangisubona iti balotana tapno maammuanna no pudno met laeng dagiti imbotosna. Impatalgedna a narigat ken imposible a nadaras a ma-hack ti computer kabayatan ti pannaka-relay dagiti election returns gapu ta adda eksklusibo a linia nga agpaay kadagiti ginasut a ribu a VCM a maiwaras iti tunggal voting precint. 

Impalagipna a ti panagbobotos ket manipud alas-sais iti bigat agingga iti alas-sais iti sardam inton Mayo 13, 2019, ken nayatiddog ti orasna ta adu dagiti presinto iti dadduma a paset ti Pilipinas dagiti adu unay ti rehistrado a botantena nangruna kadagiti dadakkel a siudad kas iti Metro Manila. Inlawlawagna a tapno pumardas ti annayas ti panagbotos ket addan iti nainsiriban a discretion ti Chairman ti Electoral Board, ngem maikkan ti prioridad dagiti masikog, baldado ken senior citizens. Inlawlawagna a nasken nga agsisinublat dagiti agbotos dagiti regular a botante ken senior citizens no adda nawadwad a bilang dagiti senior citizens tapno saan unay a mataktak dagiti nabayag a nakapila a botante. Impalagipna pay a dagiti disabled a botante ket mabalin nga asisteran ti kapamilia, asideg a kabagian, wenno kameng ti Electoral Board.

Impalagipna nga iti panagbotos ket maliklikan koma ti pannakarugit ken pannakadadael ti balota nangruna iti ngatona, ken tumutop a pannaka-shade dagiti batog dagiti mapili a numero ken nagan dagiti kandidato. Indariragna a liklikan ti agbotos iti ad-adu (over-vote) ngem ti bilang dagiti mabutosan a posision tapno saan a ma-invalid ti binutosan a pagsaadan no man pay saan a ma-invalid ti sibubukel a balota.

Nagsanay pay dagiti poll volunteers iti panagbotos iti balota ken panangisuboda iti VCM ken panangalada iti resibo ti panagbotosda a nakapaneknekanda ti kinatalged ti poll automation.  

Naipaganetget pay kadagiti PPCRV volunteers a sagrado nga akem ti panagbotos a nasken ti nainsiriban a pannakausarna a gundaway dagiti umili a mangpili kadagiti kapkapnekanda a kandidato nga agserbi iti pagilian. Nakiddaw kadakuada ti napasnek a pannakikaysada a mangsaluad ti kinasagrado ti balota, ken tumulong iti credible, honest, accurate, meaningful and peaceful election iti Ilocos Sur babaen ti pannakitimpuyogda iti Comelec ken dadduma pay a maseknan nga ahensia ti gobierno.