sinursuran-banner-sqSinursuranNi Jobert M. Pacnis

Napateg latta dagiti mannursuro

ITOY a bulan ti Nobiembre nga agleppas ti makunkuna a First Quarter ti panagadal. Naituloy latta ti panaglukat ti klase itay Oktubre 5 iti baet ti kaadda ti pandemia a sangsanguentayo.

Saan a naipangag ti ilalaaw dagiti dadduma nga academic freeze. Wenno ti pannakaisardeng pay la ti panagbasa (nga agtultuloy latta agpapan kadagitoy).

Ta napipia kano ngem ti makigasanggasat dagiti annak iti panagbasada.

Ngem naidiaya ti sabali a wagas ti panagbasa. ‘Tay makunkuna a modular learning. Nasaotayon no kasano daytoy iti kallabes nga isyu ti TNM.

Kas adipen ti tisa, adu ti naimatangan a parikut itoy a klase ti panagbasa.

Iti panangidanon kadagiti modules kadagiti ubbing, dakkel a sakripisio. Rumbeng a sanguen dagiti mannursuro ti pangta ti bayrus. Uray pay wagas dagiti dadduma a pagadalan nga ipan dagiti modules kadagiti barangay hall, addada latta met a mangbantay kadagitoy. Isuda a mismo ti mangiyawat kadagiti nagannak (maipawil kadagiti ubbing).

Dita a sumrek ti peggad. Di masinunuo no asino ti nakapulpulapol, ken no naggapuan dagiti nagannak kadagiti naglabas nga aldaw. Wen, adda dagiti safety protocols nga annuroten iti tunggal banag. Ngem adda dagiti gundaway nga agkabsiw ti tunggal maysa.

No saan a maala ti module ti maysa nga ubing iti dayta a lawas, masapul nga idanon ni mannursuro. Kapilitan a mamalaybalay. Iti inna panagsursor, di maawan ti peligro a mabalin a masagangna.

Iti pay modular, bukod ti ubing ti panagadalna. Tarabayen laeng dagiti nagannak wenno dagiti kabbalayna. Pagdaksanna itoy, kasanon dagiti ubbing nga awan panawen dagiti nagannak kadakuada?

Ta masapul met nga agsapul dagitoy iti para iti aginaldaw a masapsapulda!

Ken uray payen ibaga nga adda ti maysa kadagiti nagannak a mabati a mangtarabay kadagiti annak. Kasano a matulonganna ti anakna no iti rigat ti panagbiag ket saan met idi a nakabasa? A dina ammo ti leksion nga agdama ti anakna?

Iti biang pay ti mannursuro, no kasta nga oras ti nayeskediul a klasena, masapul a naka-online. (Uray dagiti ubbing nga adda gadget-na. ) Sungbatanna dagiti saludsod dagiti ubbing kabayatan ti panagbasada kadagiti modules. Kabayatan a sungsungbatan/ar-aramidenda dagiti aktibidad iti iggemda a module. Nayon daytoy a gastos iti biang ti mannursuro ken dagiti nagannak.

Saan ngamin nga amin a pagadalan ket adda access-na iti internet. Ken no adda man, nakapsut met ti signal. Masapul ni mannursuro ti mapan iti disso a napigsa tapno laeng maannongna ti klasena. Ditan a sumrek ti bukodna a gasto para iti load. Ta saan metten a madanon ti signal ti wifi ti pagadalan!

Ken puera delos buenos pay, adda dagiti pagadalan a naimut ti pannakaina wenno pannakaamana. Bukbukodanda ti access iti wifi ti pagadalan nupay aggapu iti MOOE (maintenance and other operating expenses) ti mailo-load itoy.

Ti panagadal-modular, agtintinnag ita a blended learning. Malalaokan ngamin iti wagas nga online. Maudi dagiti ubbing nga awan gadget-na kadagiti updates. Ken pannakatarabay! Ikalukagna lattan ti bagbagina.

Ti rigatna pay iti modular, nagastos it papel (adu pay a kayo ti maisakripisio) kada ink. Parikut ti tunggal pagadalan ti pannakaimprenta dagiti modiul. Aglalo la unayen no kasta nga adu dagiti ubbing a mawarasan. Saan nga asi-asi ti kaadu ti bondpaper a masapul. Masapul met ti adu a photocopier machine wenno printer.

Sa, puera delos buenos latta, addada manen pannakaina wenno pannakaama ti pagadalan a di mayat a mausar ti printer iti bukodda nga opisina. Pagan-anusan a pagsisinnublatan dagiti mannursuro ti maymaysa wenno dua wenno tallo a printer idinto a nakaad-adu ti masapul a maaramid a modiul.

Kasanon dagiti pagadalan a di kabaelan ti MOOE-da a patauden dagitoy? Kapilitan a bukodda manen a gastos— manipud printer (ta nangina unay no photocopier) agingga kadagiti ink, bondpaper ken staple wire. Saantayon nga inayon pay ‘ta laptop. Basic atoyen, agraman selpon, a ramit ni mannursuro.

Bukodanna a paaddaen dagitoy no kayatna nga agtultuloy ti klasena. Ta pagarigan iti Tanap, adda idi pammilin nga agsolisit dagiti mannursuro iti para kadagitoy a masapsapul. Madaksanda, kasta.

Ngem di maliklikan a mabalusingsing daytoy gapu ta saanen a kabaelan dagiti mannursuro ti magastos. Aglalo ket bassit-usit met laeng ti aw-awatenda iti binulan. Inayon pay dita ti kaadda ti baybayadanda nga utang.

Isu a limed a nagdawat iti tulong dagiti mannursuro kadagiti namnamaenda a makatulong kadakuada. Saandan nga inusar ti nagan ti school. Nakipakpakaasida lattan kadagiti kabagian, am-ammo, gagayyem wenno dagiti dati nga ubbingda a nagballigi metten iti biag. Pinapuskolda bassiten ti rupada. Napipian ngem ti mabaybay-anda ti pannakaidanon ti adal kadagiti agdama nga ubbingda.

Ti nakakatkatawa itoy, agpareport dagiti dadduma a Dibision kadagiti naaw-awat a tulong dagiti mannursuro. Manipud iti ink, bondpaper, pad paper, cash ken uray pay printer. Idinto nga impawilda ti panagsolisit.

Dida pay la ngarud ibabawida ti panangiparitda tapno saan nga aglemlemmeng dagiti mannursuro nga agsolisit para kadagiti ubbing.

Wenno husto ti pattapatta ni Apong Sabas? Kuna ngamin daytoy nga apongko nga adda kano supplemental budget ti Dibision kadagitoy a bambanag. Isuda ti rumbeng a pagtaudan dagiti magastos iti pannakaaramid dagiti module. Wenno isuda a mismo ti mangted kadagiti modules a maiwarasen. Saan pay nga isu a mainayon nga annongen dagiti mannursuro!

No saan a mapalusposan dayta a budget, mabalin a savings. Ken pagtaudanto ti nagdadakkelan a bonusda! Isu a kasta la unayen ti panaginut dagiti dadduma a Dibision. Ad-adu a mainut, ad-adu a bonus, bangbangir ti isem ni Apong Sabas a nagkuna.

Sa pay isyu ita ti panaggatang ti Departamento kadagiti luglugan. A para kano kadagiti taoda iti Dibision. Iti kasta, adda aramatenda a mangdanon kadagiti kasulinekan a pagadalan. A saanda nga agbubulod laeng. A ti pondo a naaramat ket naaprobaran pay idi kaano a tawen. A saan nga ita a panawen ti pandemia. A saan nga ita a pakasapulan ti mabusbos para iti modular learning.

Ngem adda ditoyen ti baro a wagas ti panagbasa. Masapul nga arakupen. Agtitinnulong koma ti tunggal maseknan. Saan a daytay palapalen pay laeng ni mannursuro:

Makiguduakami koma a nagannak iti sueldoda, a, ta dakami metten ti agisuro kadagiti annakmi.

Maksayan koma ti sueldoda ta awan met ti ar-aramidenda (pamiliar?).

Daytoy a modular learning, adda ketdi nadlawan a nagsayaatanna. Adu dagiti nagannak a mangag-agal iti rigat ti mangisuro kadagiti annakda (a manmano laeng). Ket nariknada ti kinapateg dagiti mannursuro. Nakita dagiti ubbing a masapulda gayam dagiti adipen ti tisa.

Ta itan a panawen, kasla bambanti laengen no maminsan dagiti mannursuro. Saanen a kas idi ti dayaw, pannakapadayaw a maipapaay kadakuada!

Binukirad daytoy a pandemia a napateg latta dagiti mannursuro!  ●