Napateg ti akem dagiti agtutubo iti kagimongan

Nangrugi itay Disiembre 10 ti makalawas a Linggo ng Kabataan a selselebraran ti sibubukel a pagilian iti tinawen.  Ta napateg unay ti akem dagiti agtutubo iti panangmuli ti naannayas a gimong. Kas kuna ti nailian a bannuar, ni Dr. Jose Rizal, dagiti agtutubo ti namnama ti pagilian. Adda kadagiti dakulapda a rumukbos ti sabali pay nga agpang ti panagdur-as ken kasasaad ti panagbiag.

Kas pangrugian nga addang tapno maisagana ken maragpat ti kapkapnekan a kasasaad ti gimong iti masakbayan, nasken ngarud a mulien dagiti agtutubo iti panangbangon iti naraniag nga agsapa babaen ti  pannakipartisipar ken pannakigamuloda iti panggep daytoy nga okasion.  Suruan ida iti umno a panangmuli iti gimong nga addaan iti nalinteg nga addang, mamuli babaen ti pannarabay ti Namarsua ken panagraem iti pada a tao ken iti linteg.

Saan la a dayta, iti daytoy a makalawas a selebrasion, nasken nga ipaay ti komemorasion wenno pammadayaw kadagiti agtutubo a nangipakitan iti ehemplo a pagulidanan, di nagpaidam a nangiyunnat kadagiti takiagda para iti panagdur-as ti sapasap, sidadaan nga immabrasa kadagiti agkasapulan. Ipaay ngarud kadakuada ti maiparbeng tapno lalo pay a maengganioda nga agaramid iti pagsayaatan; maengganioda a makibiang iti mapaspasamak iti gimong a pagnanaedanda, iti aglawlaw wenno environment ken makiraman kadagiti agdama nga isyo tapno masolbar dagiti pagparikutan; mangitaguyod ti pannakatagiben ti gameng a kultura, dagiti ugali ken tradision a namunganay iti nasayaat ken di magatadan a sursuro.

Namunganay ti Linggo ng Kabataan manipud iti Republic Act Number 7160, An Act Providing For A Local Government Code of 1991. Masarakan daytoy iti Book III, Local Government Units, Title One, The Barangay.

Nakaiyindikar dagiti sumaganad a kas pammaneknek: SECTION 439. Observance of Linggo ng Kabataan. (a) Every barangay, municipality, city and province shall, in coordination with the pederasyon ng mga sangguniang kabataan at all levels, conduct an annual activity to be known as the Linggo ng Kabataan on such date as shall be determined by the Office of the President. (b) The observance of the Linggo ng Kabataan shall include the election of the counterparts of all local elective and appointive officials, as well as heads of national offices or agencies stationed or assigned in the territorial jurisdiction of the local government unit, among in-school and community youth residing in the local government unit concerned from ages thirteen (13) to seventeen (17). During said week, they shall hold office as boy and girl officials and shall perform such duties and conduct such activities as may be provided in the ordinance enacted pursuant to this Chapter.

Tapno agbalin dagiti agtutubo a kas responsible nga umili, ited ngarud kadakuada amin nga oportunidad a makipaset ken mangpadas iti pannagna ti gobierno.#