Napateg ti edukasion kadagiti Pilipino

NAPATEG unay ti edukasion kadagiti Pilipino kas ipaneknek iti adu a bilang dagiti agturpos ita a panaggibus ti School Year. Para kadagiti agturpos iti panagadalda ken madama pay laeng nga agbasbasa, ibilangda ti edukasion kas instrumento a mangpaksiat ti kinanengneg ken kinakurapay tapno saanda nga agbalin nga ignorante ken maaddaanda iti nasaysayaat a masakbayan. Kadagiti nagannak, ibilangda ti edukasion a kapategan a sagut ken gameng a maipatawidda kadagiti annakda a saanto a pulos a mapukaw iti las-ud ti panagbiagda. Kadagiti mangisursuro, ti edukasion a mayadalda kadagiti estudianteda ket isu ti kangrunaan a pakarukodan ti kabaelan ken panagballigida iti propesionda.

Ita a panawen dagiti graduation – moving up ceremonies, tiempo ti panagraragsak dagiti agturpos iti panagadalda, dagiti nagannak ken mangay-aywan, ken dagiti mangisursuro kadakuada. Tiempo met daytoy dagiti adu a paggastosan gapu kadagiti saan unay a napateg a kasapulan dagiti agturpos kas kadagiti yearbook, aruaten, graduation ball/party, college ring ken blow-out.

Nagpaiduma ti ragsak dagiti agturpos ta kalpasan dagiti adu a tawen a panagrigrigatda kadagiti pagadalan ket apitendan ti bunga ti panagballigida. Agrag-o met dagiti nagannak ta aggibusen dagiti adu a tuok ken rigat a linak-amda iti panangisakadda iti panagadal dagiti annakda. Agdir-i met dagiti mangisursuro ta nagballigida manen iti misionda a nangipaay iti edukasion kadagiti adalanda.

Naipakadawyanen kadagiti adu a pamilia ti naindaklan a panagsagana ken panagselebrar dagiti agturpos ken nagannak iti ibilangda a nakalalagip a paset ti panagbiagda. Adda dagiti gumastos iti adu para kadagiti nabuslon a selebrasion sakbay ken kalpasan ti seremonia ti graduation nangruna kadagiti adda kadagiti eksklusibo a pribado nga eskuela. Adda dagiti graduation ball a maang-angay kadagiti five-star hotel imbes nga iti uneg dagiti pagadalan ken public auditorium. Adda pay dagiti graduation ceremonies a maangay kadagiti convention centers ken hotel imbes a kadagiti uneg lattan ti pagadalan.

Para kadagiti public schools iti salinong ti Department of Education, nainget ti direktiba ni Secretary Leonor Briones a pagbalinen a simple dagiti graduation – moving up ceremonies tapno saan a magastosan dagiti agad-adal ken nagannak. Inyetnag pay ti DepEd a dagiti school uniform dagiti estudiante ken mangisursuro ti maaramat kabayatan dagiti seremonia ti panagturpos tapno agtalinaed a nasimple ti pasken ken makasalimetmet dagiti nagannak iti gastos ti igatangda kadagiti baro nga aruaten. Ngem adda latta dagiti nagannak a komontra iti daytoy a graduation policy nga impaulog ti DepEd ta madadaanda a gumastos para iti panagturpos dagiti annakda nga ibilangda a manmano laeng a mapasamak iti panagbiagda.

Rebbengna a pagtalinaeden a nasimple dagiti graduation – moving up ceremonies kadagiti Grade schools ta dayta a panagturpos dagiti estudiante iti panagbasada ket panawen met laeng ti panangrugida iti nangatngato a tukad ti edukasion ta sumrekdanton iti kolehio.

Naluklukay ti policy ti Commission on Higher Education iti panangidaulo ni Chairman Prospero de Vera iti panagpaturpos kadagiti kolehio ken unibersidad a mangrugi metten ita a bulan. Ngem idardarirag ti CHED ti simple a panagpaturpos nangruna kadagiti state colleges and universities. Nasken a simple met laeng ti panagpaturpos iti kolehio ta adunto pay ti paggastosan dagiti agreduar kalpasan ti graduation nangruna iti panagbirok iti mastrekan a trabaho, wenno panagadal iti graduate school wenno sabali a kurso.

Nagpalagip pay ti DepEd ken CHED ti saan a pannakaawis dagiti kandidato ken politiko a guest speakers kadagiti graduation – moving up ceremonies tapno saan a mausar dayta a pasken a pagkampaniaan ken dadduma pay nga aramid-pampolitika ta nairana a panawen ita ti kampania ken mapasungadan ti eleksion.

Naipakadawyanen iti naglabas ti pannakaawis dagiti politiko nga agsarita kadagitoy a pasken ta gundaway dagiti mangimaton kadagiti pagadalan ti agkiddaw iti tulong ken pabor kadagiti kandidato wenno opisial ti gobierno.

Mabigbig ti Pilipinas iti kinaadu dagiti agturturpos iti tinawen iti Grade school ken nagduduma a kurso iti kolehio. Ngem iti laksid a ginasut a ribu dagiti tinawen nga agturturpos iti kolehio, bassit laeng a porsiento dagiti nadaras a makabirok iti tumutop a trabaho wenno pagsapulan.

Saan pay a nakastrek dagiti adu nagreduar kadagiti naglabas a tawen, ngem manayonan manen dagiti agturpos ita a tiempo. Manonto man ngatan ti mainayon iti unemployment rate wenno underemployed rate iti pagilian?

Maysa kadagiti maitudtudo a gapu ti nababa a porsiento dagiti college graduates dagiti saan a makastrek iti trabaho ket ti nababa nga education standard ti Pilipinas ken career mismatch. Dayta ti gapu a nayusuat ti Kindergarten + 12 Program tapno makapasa iti international standard ti kalidad ti edukasion iti Pilipinas. Nanayonan iti dua a tawen ti sigud a kapaut ti panagbasa iti high school, ket addan senior high school a dumanonen itan iti Grade 12 sakbay a makastrek iti kolehio. Iti senior high school, mayadal dagiti nagduduma a track a pagpilian dagiti estudiante tapno uray no saandan a makapagtuloy iti kolehio ket nasanaydan iti nagduduma nga skills a mabalin nga usarenda nga agbirok iti trabaho.

Agturpos ita a tawen ti maikadua a batch dagiti Grade 12 wenno senior high school. Ngem saan pay a mapaneknekan no nabunga met laeng ti K + 12 Program. Saan pay a makita no adu met laeng kadagiti nakaturpos iti senior high school ti makastrek kadagiti tumutop a trabaho.

No narigat pay a makastrek iti nasayaat a trabaho dagiti nagturpos iti uppat a tawen a kurso iti kolehio, amang a marigatan nga agbirok iti nasayaat a trabaho dagiti nagreduar laeng iti senior high school.

Adda dagiti agkuna nga arkos wenno dekorasion laeng dagiti diploma ta saanda nga ammo ti nauneg a kaipapananna. No man pay adda dagiti nagturpos a saanda a naipakat dagiti kurso nga inadalda, ti edukasion ken sirib a nagun-odda ket naitalimengen a gameng kadagiti panunotda a balonendanton agingga iti tungpal-biagda, ngem sakbayna mayallawatdanto ti pateg ti adal kadagiti annakda a mangitakderto kadakuada.

Congratulations to all graduates, parents and teachers!