Napekpeken pagbaludan iti Region 1: BJMP

Saanen a maiyanatup ratio iti aktual a populasion.

SAN FERNANDO CITY – Panggep ti Bureau of Jail Management and Penology (BJMP) ti mangipatakder iti kanayonan a pagbaludan inton umay a tawen tapno bumassit ti congestion rate iti Rehion 1, daytoy ti impalgak ni Senior Jail Inspector Carlos E. Boado itay nabiit.

Kinuna ni Boado a ti nakaro a pannakapekpek dagiti balud ti kangrunaan a problema kadagiti amin a pagbaludan iti rehion agsipud ta saanen a maiyanatup ti ratio iti aktual a populasion.

Segun ken ni Boado, umabuten iti 4,550 ti kadagupan a bilang dagiti balud a nakakursong kadagiti 20 a pagbaludan iti rehion idinto nga agarup 645 laeng koma dagiti nakabalud.

Iti Dagupan City, agdagupen dagiti balud iti 1,032 idinto a 95 laeng koma ti aktual a kapasidadna.

Iti San Fernando City, addan 195 a nakabalud idinto a 57 laeng koma ti bilang dagiti balud.

Innayon ni Boado nga inaprobaranen ti national headquarters ti decongestion program ti BJMP-1 ket nairamanen dagiti city jails iti San Fernando City, Dagupan City, ken San Carlos City ken dagiti 5 a district jails sadiay Agoo, La Union, Batac City, Ilocos Norte, ken Tayug, Burgos ken Balungao iti Pangasinan iti 2017 National Expenditure Program a nakailatangan iti P219,585,600.

Kabayatanna, kinuna ni Boado nga iti bilang dagiti balud iti rehion nga agdagup iti 4,702, aganay a 66 porsiento wenno 3,086 dagiti drug-related.

Kinuna ni Boado nga imminget ti seguridad iti uneg ti compound tapno saan nga agtuloy ti illegal nga aktibidad ti droga dagiti drug personalities a naibalud.

Kinuna ni Boado a napairutan ti panagkapkap ken panagsukimat kadagiti balon dagiti bisita tapno malapdan ti pannakaiserrek dagiti illegal a droga iti pagbaludan.

Innayon met ni Philippine Drug Enforcement Agency in the Ilocos Senior Administrative Officer Bismarck Bengwayen a resulta iti all-out war ti administrasion Duterte maikontra iti narkotiko dagiti adu a kaso nga adda pakainaiganda iti droga.

Mangnamnamakami a maituloy ti immuna a naplano a rehabilitation center a maipatakder iti abay ti Ilocos Training and Regional Medical Center,” kinuna ni Bengwayan. (Manipud iti report ni Miriam P. Aquino, PIA 1, La Union)