Napukan a molave, nakumpiska

GALIMUYOD, Ilocos Sur – Kinumpiska dagiti polis ditoy ti napukan a molave gapu ta awan maipakita ti nagpapukan a permiso manipud iti CENRO.

Nagresponde dagiti polis ditoy ket nagturongda iti Barangay Daldagan ditoy nga ili idi nakaawatda iti tawag iti telepono nga adda mapukpukan a molave tree iti nasao a barangay idi agarup 12:20 ti malem ti Marso 17.

Napukanen ti kayo idi makasangpet dagiti polis. Mapapati a ni Raymunda Villanueva, residente iti Barangay Calongbuyan, iti Galimuyod met laeng, ti nangibilin iti pannakapukan ti kayo.

Kinumpiska dagiti polis ti napukan a kayo agraman ti chainsaw a naaramat iti pannakapukanna idi awan ti maipakita ni Villanueva a permit wenno dokumento manipud iti CENRO a mangpukan iti molave.#